Urişqutno d’Jezayır hule maqırhonutho calu qrobo d’Libya

U rişqutno d’Jezayır Cabel Majid Taboun mırle; İ aykanoyutho d’Libya, tekrar du senario d’Suriya’yo. A hayle frişe dkımharbi bu qrobo gawoyo d’Suriya, cayni hayle dkıtne ucdo b’Libya’ne.

 Bi sbuthathe d’Libya mawdıcste, nahito tayosto hreto d’Turkiya bu athro. Bi tayostathe, kıtwo 126 marhıbone noqufe d’Turkiya dınqili me Suriya l’Libya leşan dımharbi.

 U rişqutno d’Jezayır Abdel Majid Taboun huwle maqırhonutho calu qrobo dıkmdawım b’Libya u mawdacle, da hayle frişe dıkmharbi adyawma b’Suriya, cayni hayle’ne dıkmnasın dkıbşi u athro d’Libya. U rişqutno d’Jezayir m’akadle, dkito gado rabo l’methcadronutho caman athrawotho şbobe xıd Mısır u Tunıs, bnişo dmiqafe şroyo lu krizano d’Libya.

 Taboun mırle; U planaydan qriho’yo-u qrobano lıgmitakle bu darbo folhoyo, elo kibe belhude dmisafe ba droşe ubu dialog-cal du admo dıkmibız-u admo da Libyoye’yo u latyo u admo da hayle dkubci kıbşi u athro. Ahna latlan yuthrono momuno mi aykanoyutho d’Libya-kıbcina belhude dmitaklın a taxtuşe ubi sbuthathe hadire’na l’methcadronutho leşan dmitakle u krizano d’Libya.

 Me gabo hreno mawdıc, d’Turkiya mşadarla tayosto hreto l’Libya, dkıtwo bıgawa 126 marhıbone noqufe dınqili me Suriya leşan dımharbi bu athro. Leşan u nqolo da marhıbonani l’Libya, ftıhwola Turkiya korridor oyaroyo beyn da 2 athrawotho. U nqolo da folhani sim b’zabno, d’Emwotho Mhaydotho kımnasyo dmitabde dialog beyn da hayle dıkharbi b’Libya.

 Athmıl’ste, sımwola Turkiya tadbiqat folhoyo bu madınho du yamo Mescoyo, leşan dmahwiyo u haylayda, hem la hayle du rabhaylawotho saqıbloyo Khalifa Haftar u hemste la hayle Yawonoye udı Qufrus. U tadbiqatano d’Turkiya mdawamwole 8 şoce u mıştawtafwolele ba casrowat d’sfinotho u tayosyotho du qrobo.