Urişwazire d’Austurya mawdacle lıgdobın darbo la hiyal d’Turkiya bi sbutho da galwoye

U rişwazire du athro d’Austurya Sebastian Kurz bi maqırhonutho dhule komır Turkiya ba hiyal dkıbco dsaymo bi sbutho da galwoye lı kobinala darbo. Kurz Komır ahna u huyodo d’Urifi mcawanlan u athro du yawnan dkıtyo athro d’Urifi laşan i sbutho da galwoye, bu şıkılano hulan mahwelan dlı kothina la teştcınye da tahdide dı Turkiya.

Turkiya hani zabno yarixo kmıstacmılo isbutho da galwoye mqabıl du huyodo d’Urifi, laşan dmaydo mcadronutho ba mılyune me Urifi. Bıhaq da sıbwothani u rişwazire d’Austurya Sebastian Kurz hule maqırhonutho li sfaryamo dıkmıqroyo ğalabe bu Yawnan Kthimirini u mırle. Qulnaqa Turkiya ksaymo tahdid u huyodo d’Urifi bi sbutho da galwoye elo haw kobinala darbo dı saymo u medano.

Mıhlıf dsındina Turkiya bu yarho d’Oder di şatathe mşadarlan mcadronutho l’Meric u haylo dkıtyo cala thume du Yawnan laşan dlıcıbri a galwoye lo qonunoyith. U nişo dkıtwolan bi sbuthathe dobina zuhoro lı Turkiya dlıgmaqıblina a teştıcınye dkıbco saymo.

Bhaq di sbuthathe ba yawmotho d’şaficiweyna Turkiya mawdacwole du qatro da galwoye dkıtne sida klozım miqafelın şroyo u hathe urifi khozyola xıd tahdid, naqqa hreto xıd ğalabe naqat Erdoğan mawdacwole dıgfıthi a tarcathe lu nfoqo da galwoye me Turkiya, u bi sbutho d’Suriya ftıhwola atarce elo u athro du Yawnan camu snodo d’Urifi maklewolın agalwoye cala tarce da thume dkıtlın cam Turkiya.