USUP bu buyono dıfrısle mahwele hfuxyo mqabıl da teştecenye di şultonutho Turkeyto calu cameydan

U gabo du Huyodo Suryoyo Tibeloyo d’USUP, mawdacle du qoyumo Suryoyo Tuma Çelik, kmisım hjomo acle, cal dmahwele caşinutho rabtho b’gawıd du parlamento dı Turkiya u d’maglele cali diktatoriye du rejim d’Erdoğan u dıtlıble mene dmıctarıf bu qtolğenso du Sayfo.

 USUP bu buyono dıfrısle mawdacleste da şutose u hudre u froshezwe du camaydan dıknıfqi mqabıl du ağuno d’kobele Çelik, dukane di tagoruthone dkıtne masre cama nistixbarat dı Turkiya.

 U gabo du Huyodo Suryoyo Tibeloyo d’USUP dkımrayşanle İbrahim Murad, bu buyono dıfrısle lu tboco froso mawdacle da Mşihoye u dilonoyith u camo Suryoyo kımdawmi dhowın nişo la hjome mtakse dıkmisomi mu rişono du rejim dı Turkiya Receb Tayip Erdoğan, mu gabayde d’AKP umi şultonuthayde. USUP bu buyonayde mawdacleste di naqlathe b’şıkıl cjiqo kmıhjım calu qoyumo Suryoyo ihidoyo bu parlamento dı Turkiya Tuma Çelik dkıtyo saqıbloyo li şultonutho d’Erdoğan.

USUP bu buyono dıfrısle makadle du qoyumo Çelik mahwele caşinutho rabtho ba mamle dsımle b’gawıd du parlamento dı Turkiya, tlıble a’zedqe du camayde u maglele cala dyoşe ucala gunhe dsımle u rejim dı Turkiya ba maşıqle mşahılfe du makthabzabno ubi qadmoyuthathe dıtlıble mi şultonutho d’Erdoğan dmıctarfo bu qtolğenso du Sayfo u dobo tezminat lu camo Suryoyo-Othuroyo-Kaldoyo u Armınoyo u Yawnoyo u ğer cameste. Bebzabno, USUP mawdacle du gabo d’Erdoğan wi şultonuthayde kımtaybi komplowiye awkith tahrazyotho bceldboboye mqabıl dkul qolo ağunisto hiro, ukımdawmiste bu kboşo da n’arcotho u citotho du camaydan, kmımsoki a’rişone tawdithoye ukqıtli amdinoye, bnişo dmıfroso i zuctho ba lebawotho da bnaymothoye du camaydan dfayişi bu athro da nabohotho.

Camgabıdathe, USUP mawdacle di şultonutho d’Erdoğan mıthabatla dkıtyo şultonutho dıksındo i marhbonutho wi tuxmonoyutho lawğıl ularwal du athro dı Turkiya, elo bebzabno mawdacle dkıtyo mdamro mhın şutose, hudre u froshezwe du camaydan dıksındi i kampanya cjıqto dıkmisomo calu qoyumo Suryoyo Tuma Çelik, uba melani mdawamle “a’dukanani lımayadlın u ağuno du hawraydan dmıştawtafwole la tagılyotho u dıtlıbwole a’zedqe du camaydan uda came dhılimoye dı Turkiya, wi celtho du qedomo da dukanani dkıtne masre cama istixbarat Turkoye qrıhtoyo uknıflo bu taro di nxilutho di xiyene du camaydan”. Callathe, u gabo du Huyodo Suryoyo Tibeloyo tlıble mu kenşo Suryoyo u Mşihoyo, ma tukose da zedqe noşoye, ma nathrawotho Caraboye u Macırboye uma şutose du tboco froso dsaymi hboso cal Turkiya, bnişo dmitaklın adyoşe dıksaymolın bhaq da zedqe udi hirutho da came.

U gabo d’USUP bu huthomo du buyonayde, makadle du hjomo dıkmisım calu qoyumo Tuma Çelik lgıdmakle u ağuno dkobın laşan i hirutho du camaydan, u mawdacleste da rejime diktator mıqqa dhuyo i qaşyuthathe, bi harayto dkulle azolene lu tyomo.