USUP kımdawım bi mcadronutho lu camo d’Lebnon

U gabo du Huyodo Suryoyo Tibeloyo kımdawım i kampanyayde di mcadronutho dlu camaydan dkıtyo sniqoyo bu athro d’Lebnon.

 USUP mfaraqle athmıl alfo kise d’lahmo cala bote du camaydan dıkhoyın bhın fenyotho bi mdito d’Beyrut ub’Zahle, wi mcadronuthathe gıdmdawmo l’zabno d’şawco yawme.

 Bi cohnutho du cedo du qadişo Mor Maron, u gabo du Huyodo Suryoyo Tibeloyo USUP mawdacle dgımabde kampanya hathto di mcadronutho lu camaydan dkıtyo sniqoyo b’Lebnon, mi celtho du kriz momunoyo dıkşofıc u athro ebe bu maşıqlano.

Bu taro di kampanyathe, u gabo d’USUP u acme’ste i Knuşto Kenşoyto du Huyodo di Claymutho Suryoyto dkıtyo hdo ma şutosayde, mfaraqlın athmıl alfo kise d’lahmo cala bote u citotho du camaydan dkıtne ba fenyotho d’Almatın bu Turo d’Lebnon, ba fenyotho d’Sad Albuşriye, Bırj Hammud, Alnabca u Alaşrafiye b’Beyrut u gawonoyith’ste bi mdito d’Zahle.

U feroqo du lahmo dımşarele athmıl, gıdmdawım hol 7 yawme awkith hul 16 bu yarhano d’Şbot. Camgabıdathe, USUP kımdawım dımqadım mcadrınwotho du muklo udu hulmono la sniqoye du camaydan d’Lebnon, bi rocyutho da gabe u şutose du Mawtbo Umthoyo d’Bethnahrin d’MUB, ubu snodo momunoyo dıkmqadım u camaydan wa şutosayde dkıtne bi golutho.