USUP mahıtle klilo d’warde cali qoyumtho du Sayfo da Armınoye

U gabo du Huyodo Suryoyo Tibeloyo wu gabo da Armnoye Elramağfar mathkarlın a sohde da tre came dhawın debho bi şato da 1915 b’klile d’warde dmahatlın cala qoyumyotho du camo Armnoyo u du camo Suryoyo.

Ba mamle dsımlın a rişone da tre gabe maqrahlın, dımdawmi ba fulhone mşawtfe hul dmotın la zedqe camonoye u dmadıcri a arcpotho dıkbişi ma cuthmanoye.

Bu duxrono da 106 eşne du Sayfo, taşdarto mu gabo du camo Suryoyo udu camo Armnoyo-bi rişonutho da rişone du gabo du Huyodo Suryoyo Tibeloyo Brahim Murad wu rişono du gabo d’Elramağfar Sefak Hagobyan mathkarlın u duxrononano bu tehito d’klile d’warde cala qoyumyotho da sohde da 2 came.

I taşdarto d’USUP bi qamayto sımla socurutho l’Mor Afrem Suryoyo bi fnitho Elsyufi bi Aşrafiye u mahıtlın klilo d’warde cali qoyumto du Sayfo du camaydan wu kohno qaşişo George Cabdallah maqımle teşmeşto cali ruho da sohde. Bıthır i taşdarto azza li fatıryarxutho da Armnoye Orthoduksoye bi fnitho d’Analyas u mahatla klilo d’warde cali qoyumto da Sohde Armnoye.

Bıthır a 2 rişone mqadamlın mamlo bu duxronano du Sayfo. Bu mamlo dsımle Brahim Murad mırle; Ahna wa ahunoneydan a Armnoye, kull şato kamthıkrina u duxrono du Sayfo b’hfitutho rabtho elo adşato mu kewo di Corona, lo qadirina zıttır mıd mahtina klilo d’warde- mawxa’ste ktılbina şubqono ma Sohdeydan.

Bu mamlayde Murad mırle; Ahna lıktocina a Sohdeydan walaw dızze alfayo d’eşne u makadle dgımdawmi u ağunathe hul dlo foyış ha farsufo dıkmankır u Sayfano dan Armnoye u da Suryoye. Bu huthomo du mamlayde u rişono du gabo d’USUP mırle; Kull haylo folitiqoyo aw farsufe dıkmankır u Sayfano, şorikoyo cami zıhniye diktator di mamlaxtho Cuthmanoyto.

Me gabo hreno bu mamlo dsımle u rişono du gabo da Armnoye Sefak Hagobyan mırle; İ sohdutho da 2 came-hdo sohdutho’yo wu gabaydan kull naqla gıdfoyış u gıdcowıd camu gabo du Huyodo Suryoyo Tibeloyo, hol dmitadcıri an arcotho da camani u dmi’amno i hiruthathe.