USUP mfaraqle mcadrınwotho la eqaryotho sniqoye b’Lebnon

Bu snodo du Mawtbo Umthoyo d’Bethnahrin-MUB, u gabo du Huyodo Suryoyo Tibeloyo, mfaraqle a mcadrınwotho momunoye dıkmitahwın kull yarho, la yaqrotho sniqoye du camaydan b’Lebnon.

Bıthır mıd kamıl u feroqo di mcadronutho, u rişono d’USUP İbrahim Murad bu mamlo dsımle, mawdacle dıklozım a Lebnonoye dmahti ido bido mqabıl du kboşo du İran uda rişone folitiqoye dımşahlaflın Lebnon l’gihano. 

Bu taro di tarmithayde di mcadronutho du camaydan d’Lebnon, u gabo du Huyodo Suryoyo Tibeloyo, mfaraqle mcadrınwotho momunoye l’200 yaqrotho du camaydan dkıtne ğalabe sniqoye b’Beyrut. USUP mfaraqle a mcadrınwothani a yarhonoye bu qentrunayde u gawonoyo b’Beyrut, bu snodo du Mawtbo Umthoyo d’Bethnahrin-dkıtyo USUP ha ma hadomayde.

Bıthır mıd kamıl u feroqo di mcadronutho, u rişono İbrahim Murad bu mamlo dsımle mırle; U grub dıkhokım u athro xıdu şudoyo dhuwole-mawbele Lebnon wu camayde l’gihano. Lebnon bu makthabzabnayda kule lathila hakome u mşale dholume xıda rişone d’ucdo dıkfulhi lalyo u imomo leşan dmatimi u camo u dsıhfi u athro. Lıkkowe d’maşılmina ruhayna u dfurşina ruhayna mu kriz dkito b’Lebnon. U qetraydan u rişoyo u İran’yo dıkobış u athraydan bu darbo da noqufayde. Mıqa dhowe u timo da badale klzoım dobina mrodo, dmihaydina u dmahtina ido bido, leşan dnufqina moro lu admo dban alfayo d’sohde, yasire u mciqe.

Bebzabno, Murad mawdacle dhınne xıd Lebnonoye kıtte tarmitho du furqono du athro mu kboşo du İran uma gefayde, u makadle’ste dkıtne sniqoye dmişatıs gbino larwal ma yuthrone farsufoye uda gabe, leşan dmaqlıbi i gihano dıkcayşi l’şuroyo d’haye u sabro hatho, dilonoyith du kenşo Emwothoyo wa rişone dbritho knutri ucdo i hdoyutho da Lebnonoye, leşan dşufci li harke u dımcadrilın.