USUP mtayable knuşyo cali federaliye b’Lebnon

U rişono gawonoyo du gabo du Huyodo Suryoyo Tibeloyo Brahim Murad maqrahle cali tahrazto federaloyto dımabdewole u gabo bi şato da 2015.

 Murad mırle; mahwele ftiho, da şultonwotho dkıtne qentrunoye shifi u law kobın funoyo la came bu Madınho Mescoyo. Wu Lebnon dkıtyo ha ma athrawothani, klozamla şuhlofo.

 Bu knuşyo dsımle u gabo du Huyodo Suryoyo Tibeloyo bu qentrunayde d’Zahle bi mtaybonutho du notarozo gawonoyo sniğro Mişel Mallo, i rişonitho du ferco d’Zahle sniğarto Zandra Kfuri wa hadome da sicotho gawonoye udi dukotho, u rişono Brahim Murad huwle maqırhonutho u mırle; U gabo kmawdıc ba şartat dkito kımaglena cala fulhone dkıtlan li federaloyutho d’Lebnon, dımşarewolan ebeye ba 2015.

Murad mırle; Ahna xıd gabo, ruşmoyith mabdewolın a fulhone di federaliye du athro bu zabno dmıştawtafwolan lu lumodo dsımwo u dkıtwayna ahna ha ma gabe mşatsonayde. A şultonwotho qentrunoye kımdabri u camathe bu qonuno qaşyo du farslo. Bu athro d’Lebnon i şultonutho qentrunoyto matyo l’darğo fşılo u dmishofo. Mawxa a fulhoneydan du talab di federaliye bıthır mucdo gıdkmaqwenalın.Metul i şıltonutho federaloyto kım’amno a zedqe da came wa zedqe da mardwotho u tawdiyotho mşahılfotho dkito bu athro.

U rişono Brahim Murad dmahkele bı rwihutho cala yuthrone di şultonutho federaloyto la came u mardwotho mşahılfotho, mırle; Kıhozina a qrobo wa taşniqe dkowın ban athrawotho du Madınho Mescoyo ubu athreydan d’Lebnon. Mawxa bıthır mucdo a fulhonaydan xıd gabo, gıdmatinalın bu zyudo cala fulhone di federaliye d’Lebnon. Brahim Murad bu huthomo du mamleyde mırle; İnaqla d’Lebnon dmişatıs eba federaliye, gıdxolıs ma qatle, mu kafno, mu fasad d’axile a garme di siyase uda folitiqore du athro.