Utboco froso kıgoruş u zuhoro cali kampanya dımabdewole ESU

Mu zabno dmabdele u Huyodo Suroyo d’Urifi ESU i kampanyayde da imdhat leşan i mawdyonutho bu Sayfo dan 1915, kımdawım u tboco froso Emwothoyo dgorış u zuhoro cali kampanyathe.

 Ucdoste i dafo du ajans d’Fırat News, wi dafo du camaydan d’İshtartv, grışlın u zuhoro cali kampanyathe d’ESU. Ba tebani dıfrisi, griş u zuhoro cal ESU, du Huyodo d’Urifi dmawde bu qtolğenso dsımwola i mamlaxtho da Cuthmanoye calu camaydan bu zabno du qrobo qamoyo dıbritho.

 I dafo du nawlo d’Fırat News wi dafo d’İshtartv, frıslın tebe cali kampanya da imdhat dmabdele u Huyodo Suroyo d’Urifi ESU. Bu şuroyo da tebani mahke calu camaydan dkıtyo qalilto etnikoyto u tawdithoyto bu Madınho Mescoyo wi kampanya dmabdıyo leşan u parlamento d’Urifi ruşmoyith dımawde bu Sayfo dan 1915, dıqtil ebe hol 500 alfo neşe, tloye u gabre mi mamlaxtho da Cuthmanoye.

 Ba dafani mawdıc d’ESU kobıc bi mawdyonutho di şrorutho du makthabzabno udi kinutho, du Huyodo d’Urifi dmathkır 15 bu yarho d’Hzirın, u yawmo da Sohde du Sayfano dsımwo meqım mo eşne. ESU kıtle sabro dıqodır dmahwe lu kenşo Emwothoyo kule, dkıtle snodo rwiho ma parlamentowiye du Swed, d’Almanya, d’Hollanda, Austuria, Suriya u Armenia leşan dmoyıd i sbuthathe jıddi li ido.

 Ba tebani d’Fırat News u İshtartv kmitahke cali egartho dıfrısle ESU u dıkmitahke eba calu Sayfo dsim calu camaydan, u mafqono qaşyo, u aydarbo jbir u camaydan dhowe Maşılmono, aydarbo manhıbi u mahrıwi ba mowat d’citotho, dayre b’Turabdin, Hakkari u Van, Urmia u Adiyaman.

 Mawdıcste du tukoso Emwothoyo da yadıcthone dcalu qtolğenso mawdewole ba 2007, dsim qtolğenso cala Mşihoye bi mamlaxtho da Cuthmanoye beyn da eşne 1914 u 1923. Bu huthomo du tebanoste mawdıc, du qtolğensano dsim i mşaluthayde d’Turkiya’yo uda qamoye du gabo Qutnuthoyo da came, dheş kmdawmi dmankırile.