Washington mbayanla ikleyteyda cali sbutho du qyomo du nukler camu İran

İ mdabronutho d’Waşington mbayanla iklayto qrıhto dkıtla bi sbutho du qyomo İranoyo dcalu nukler, u mawdacla dhadırtoyo dyıtwo l’duroşe hathe cam Tahran, elo b’şart dmafito u mede dıkmıtlıb mena la haye.

 Camgabıdathe, hamşo sinatore rabe d’Amerika tlıblın mu rişono du athro Jeo Biden, dlımıştawtıf lu qyomo du nukler dcamu İran, u dmibayın tahrazto hıdo mhayadto ma tıre gabe da qutnuthoye u demoqratoye, lu nfoqo mqabıl du İran.

 U Qusro Heworo, mawdacle d’Waşington hawyo fsoqsabro mu İran dırfıdle dmıştawtıf la droşe lo ruşmoye cam Amerika u Urifi, bi sbutho di tahrazto du nukler. İ malılto du Qusro Heworo Jen Bsaki bi maqırhonutho dhula lu tboco froso mawdacla d’Amerika heş hadırtoyo dıdcro dmıştawtıfo m’hatho la droşe deblomasi şarire cami şultonutho dı Tahran, elo b’şarto dmihalqo bu şuroyo dkulle i dawse dıkmıtlıb dımhalaqla u İran bi sbutho du nukler.

Bsaki mawdacla ste d’Amerika gıdhowela nuqoşe camu grub d’5 +  1 laşan dmiqafe u darbo dıkfotıh u tarco qum du fulhono deblomasi camu İran.

U İran athmıl rfıdle ruşmoyith i rmoyto dımqadmo m’Urifi bi sbutho dmitayıb knuşyo cama n’athrawotho G4+1 bi mıştawtfonutho d’Amerika. İ wazirutho di baroyutho du İran bu fuşoqo dhula, mawdacla di mdabronutho d’Jeo Biden lıtrela mi siyase du hboso huli harayto dımşaryowola i mdabronutho du rişono dmeqım Donald Trump.

Camgabıdathe, hamşo ma sinatore rabe di kongre d’Amerika mu gabo da qutnuthoye, bi egartho dımşadrolın l’Biden, tlıblın d’mıtroyo Amerika larwal du qyomo du nukler dcamu İran, u mawdaclın du qyomo dımdewo i şato da 2015 malyoyo qetre ukımbayın ste zabne karye da qayde dmahtiwo cala fulhone İranoye du nukler. A’sinatore Jeyms Enhov, Jeyms Rish, Rob Portman, Pat Tomi u Robyo Marko bi egartho dımşadrolın mırlın “Amerika laşan d’obo ud’şuqlo camu İran sniqoytoyo l’stratiji rwiho ma tre gabe qutnuthoyo u demoqratoyo, bnişo dmitaqimi mi holo a’fulhone İranoye dkımharhızi i şalyutho di fnitho. Uklozım ste dmiakıd da qayde dmahti cali tahrazto İranoyto du nukler dhowın yarixe, b’şıkıl dıkmakfe dmisım u garanti dlımıstacımlo Tahran u nukler xıd ale dkımhadıdo eba a’şbobayda”.

U şudoyo dhuwole Biden d’Amerika kıbco dıdıcro lu qyomo du nukler dacmu İran snıdwo mu taraf d’Urifi, elo bebzabno trewole otho d’şuwolo ste sa sinatore demoqratoye. U rişono di sictho da n’esore baroye bi kongre d’Amerika sinator Pob Menendiz ba yawme dşaficina mırwole “balhude u dcoro lu qyomo du nukler gıdhowe qetro”.