World Council of Arameans (Syriacs) mtayable konferans b’Giessen Almanya

GIESSEN, ALMANYA – U lumodano yawmed sabtho mşarele bi slutho du hasyo di marcitho Mor Filiksinos Mattias Nayiş dmıştawtafwole cal ışme di fatıryarxutho di cito Suryoyto Orthoduksoyto. Bıthır u rişono du Huyodo Oromoyo (Suryoyo) Tibeloyo myaqro Johny Messo mahkele calu nişo du konferansano, dkıtyo u qedomo da gabe u şutose du cameydan lhdode u mırle’ste; Fsihoyono du Mawtbo Umthoyo d’Bethnahrin wi Mtakasto Othuroyto Demoqratoyto dmaqbelın i zminuthaydan u dhadiri beynotheyna.

Messo bu mamleyde kali cali ulsoyutho di hdoyutho da gabe u şutose du cameydan leşan u tlobo da zedqe du cameydan bu athro d’Suriya. I tahrazto du lumodano dkıtwa catırto, mdawamla ba mamle d’2 profesore dr. Herbert Niehr u dr.Werner Arnold, dmahkelın calu makthabzabno d’Suriya ucalu leşono Oromoyo Suryoyo dkıtyo u leşono şersoyo d’Suriya. U lumodo mdawamle ba mamle d’Johny Shabo, Johny Gabriel, Saadallah Barakat, Mor Boutros Kasis u hasyo di mdito d’Holob u Danho Gawriye mahkelın kul ha bu dawreyde cali aykanoyutho d’Darmsuq, Maalula, Sadad, Hımıs, Holob u Qamişli.

Bıthır’ste mşarele u droşo dbeyn da gabe dkıtwın hadire-bi mathlonutho d’Hanibal Yakub cal ışme du Mawtbo Umthoyo d’Bethnahrin, Said Yildiz mi Mtakasto Othuroyto Demoqratoyto, Malke Toprak cal ışme du Huyodo Oromoyo Tibeloyo, dım’akade da fulhone mşawtıfe bi sbutho du tlobo da zedqe du camaydan b’Suriya u mırlın; Athi u zabno dmihaliq dawsat camhıdode leşan u kthowo d’makthabzabno hatho di hdoyutho du cameydan.

U lumodano mdawamle cala esore beyn di cito udu camo bu mamlo d’Adnan Mermertas u mathlono WCA, Dawut Aslan u rişono di marcitho d’Almanya u Illo Aksan u rişono di marcitho d’Hollanda. Mahwe’ste video mu mşadro dilonoyo du rişwazire d Almanya bi sbutho d’Suriya-Tobias Lindner dmahkele cali yasifutho d’Almanya l’Suriya u mhanele u lumodano dkıtyo makthabzabno’yo.

Bu droşo dhawi cama qoyume du cameydan-Isa Kahraman me Hollanda, Yusuf Aydin mu Swed, u mathlono d’WCA Daniel Demir wu rişono du şutoso İsarloyo Mşihoyo Shadi Khalloul dmahkelın cali ulsoyutho du lobby mşawtıfo u mırlın; A gabe du cameydan mın dtulbi menayna, hadirena d’sundinalın ba esore dcam britho. Bıthır mıd hiw darbo la hadire dımşayli a şwolathe u dobın a renyathe calu lumodo, matiwo u darbo du mamlo du huthomo du konferansano d’WCA dsim mu rişonayde Johny Messo dkali cali ulsoyutho di hdoyutho da gabe du cameydan u mırle; Bıthır mu lumodano gıdmdawmina a ytawyotheydan camhıdode b’sicotho ma gabe dktwın hadire leşan dmibayın tahrazto du tlobo da zedqe du cameydan d’Suriya camhıdode.

Johny Messo hule mathle cali ulsoyutho di hdoyutho du cameydan dgımaqımro u cameydan u mırle; En ahna dhowina hadire bu zabno dımşarewolın a qetre d’Suriya, gıdhowewolan zıttır me 20 alfo folhe wi naqla’yo Amerika wa hayle hrene gıdsaymiwo esore acmeyna u mahkele’ste cal nuqze da talabe dkıtte lu cameydan d’Suriya dgımıdroşi cama gabe du cameydan u bıthır gıdmıtlobi  camhıdode. U lumodano kamil b’muzogo di hdoyutho u gris surotho camhıdode beyn da mathlone da gabe u şutose u huyode dkıtle u camaydan.