Xaxam Hamra dacir li Darimsuq bithir me 33 eşne

DARIMSUQ – U xaxam Suri Yusıf Al(h)amra mahwele i fsihutho rabtho dkıtle bi socuruthayde lu athro d’Suriya u mathkarle a’cuhdone dkıtle bı Darımsuq, elo mşalo mi mdabronutho zabnoyto d’Suriya mawdacle da hadome di taşdarto da Yudoye athın l’Darımsuq laşan dmathkıri a’cuhdonaththe, dmadcıri a’mulkonaththe udımtaybi knuşyo cami mdabronutho du maşıqlo folitiqoyo hatho d’Suriya. 

U xaxam Alhamra bu zabno dkarıx ba şawthawotho u şuqone catiqe dı Darımsuq mırle “ıno u farsufo Yudoyo qamoyo no dıkdocır lu athro d’Suriya. Matino yawme dı Tre dşaficina casriye cam abri, u laqino ba comure di şawthaydi”. 

U xaxam Alhamra dıdacır l’Darımsuq bıthır mıdşafıc 33 ışne calu nfoqayde m’Suriya mi celtho du rejim du Bacıth, mahwele ste u haşayde calu hsurono wu shofo dhawi bi şawthayde. Alhamra dmawdacle di şawthayde xalyo ma comure, mırle ste “i taşdarto da Yudoye d’athyo l’Suriya, bıthır mıddıcro l’Amerika gıdhowela ytawto bu Qusro Heworo b’Waşington, u tamo gıdtılbo dmitaqimi a’tedbire mcal Suriya, laşan dmicadır u camo dıkcoyış b’şartat qaşye di ciyeşe”. 

U xaxam Alhamra camu grub hreno da Yudoye sımlın socurwotho lhın ma kenese makthabzabnoye dkıtne bı Darımsuq, baynothaye u kenes d’Alfaranj wu kenes d’Alraki, u zırlın ste i madraşto Yudoyto d’Ibın Maymun wu kenes d’Jobar dıshif mfothıd du qrobo b’Suriya. 

Bi şato da na’1992 mawfaqwo m’Suriya zıd m’5 alfo Yudoye dlo mu sebyonaththe mu rejim d’Hafıdh Alasad, uçbiriwo dmarkıwi a’hayaththe b’Amerika ubhın athrawotho d’Urifi. 

Ubu zabno du rejim d’Başşar Alasad, lew fsoso la Yudoye dıdıcri l’Suriya, u mahıt ido cala mulkonaththe.