Yadıcthone emwothoye tlıblın dmisım buqore şarye calu furqoco dhawi b’Lebnon

Yadıcthone emwothoye bu haqlo da zedqe noşoye, tlıblın dmisım buqore şarye u msarhıbe bi sbutho du furqoco dhawiwo i şabtho dşaficina bi mditho d’Bayrut.

 Bebzabno, ayadıcthonani mahwelın ilothnihuthathe mi mardutho dlıkmimıd hşowo mnoşo b’Lebnon.

 Menyono ma yadıcthone d’Ewmotho Mhaydotho bu haqlo da zedqe noşoye, bu buyono dıfrıslın athmıl lu tboco froso, mawdaclın du furqoco rabo u mahişono dhızewole Bayrut arbıco bu yarhano, sniqoyoyo l’buqore şarye u msarhıbe dkımakdi i masirutho dkıtla Emwotho Mahydotho cama zedqe noşoye, udıkqırhi imşalutho udıkmawbıli lafi kinutho wu myodo du hşowo.

U grub da yadıcthonani dıkmişakıl m’38 farsufe, tlıblın mu mawtbo da zedqe noşoye d’Emwotho Mhaydotho, dımtayıb knuşyo dilonoyo bu yarho d’İlıl dıbqamuthayna, bnişo dıdorış u gunho rabo noşoyano dhawi bi mditho d’Bayrut.

Bu buyonaththe u maşwtıfo, ayadıcthone emwothoye mırlın “u fsoso dgımitahwe la buqorani klozım dhowe rwiho, laşan dmitagle cal kul dyoşo dkıtla i şultonutho wa şutose ruşmoye d’Lebnon bu haqlo da zedqe noşoye. Uklozımste ba buqorani dlımitagle cala hiyoywotho da debhe uda sohude, udmitagle cali netije da buqorani lıbritho”.

Bebzabno, ayadıcthone emwothoye tlıblın mi şultonutho d’Lebnon, dobo fsoso la tagılyotho mşayne u dsaymo u sutoro da mtagılyone wa gelyunore, u makadlınste dıklozım a’Lebnonoye kulle, u kenşo mdinoyo wa kenşe dıhzelın husrono dmitahwelın mkono dhowın mathrone bu snoco du fusqono siyasi d’Lebnon dilonoyith bu maşıqlo casqano ducdo.

Meqım mathe, u rişono du gabo du Huyodo Suryoyo Tibeloyo d’USUP İbrahim Murad, mawdacwole di şultonutho d’Lebnon yasırtoyo bidothıd du gabo d’Hizballa u balhude kımşablo ayuthronayde. Mawxa Murad tlıbwole dmisım u sutoro d’Lebnon m’Emwotho Mhaydotho.