Yurdnon şrele u Tukoso da Ahunone Maşılmone

Bu fusqono dmıdle u bethdino d’Yurdnon, şrele ruşmoyith u tukoso dan Ahunone Maşılmone.

 Mawdıc du fusqonano du bethdino mid, cal dan Ahunone Maşılmone lo markawlın u statu qonunoyo dkıte lfuth a qonune ruşmoye d’Yurdnon.

Bu quwolo dsim bu bethdino d’Yurdnon, a dayone matın athmıl l’awyutho cal fusqono, dmışre u gabo dan Ahunone Maşılmone dkıtyo bu athro. I celtho du fusqonanoste, cal du tukosano lo mcadele u statu wu xtutayde lfuth a qonune ruşmoye d’Yurdnon.

Mawdıcste du fusqonano mid, bıthır mıd u tukoso mqadamle şkuwe mqabıl du şutosayde du Kenşo dan Ahunone Maşılmono dabıc dmıflığ mene mcal fothe d’qetre d’arcotho. Heş ma 2015, kito şwolo beyn du grubana da reformist udu grub catiqo dan Ahunone Maşılmone mcal fothe di saqıbloyutho dkito beyn da 2 grubaniste, xliq mwatyutho bu athro.

U fusqonano du bethdino d’Yurdnon’ste dilonoyith şafocoyo lu grub catiqo dan Ahunone Maşılmone dımşataswo ban 1945, d’mid meqım ma guboye gawonoye dıgmisomi bu athro. Mınyono d’athrawotho du Madınho Mescoyo, kımfaşqi u grubano dan Ahunone Maşılmone xıd tukoso marhıbono.