YUSUF METTE MAMLO CALU KNUŞYO DSİM

Bi mıştawtfonuthayde lu turgomo dımtayable u koalisyon d’Athra bi mditho d’Bağdede laşan dmawdıc i lohithayde da guboye da mawtbe da hiğmınwotho du Ciraq, u rişono du gabo du Huyodo d’Bethnahrin Athroyo Yusıf Yacqub Matti bu mamlo dsımle la hadire mırle “I egarthaydi la n’abne du camaydan dmıftakri towoyo dlayto camo bıbritho dqadır dmoyıd a’zedqayde dlo ağuno folitiqoyo. Klozım u camaydan dım’ayıd a’gabe dkobın ağuno şariro bu haqlo folitiqoyo. Elo u qatro bu camaydan yo dlıkfohım hul ucdo mınyo u gabo? U mınyo u renyo folitiqoyo wu ağuno folitiqoyo u mınne a’zedqayde?. Ahna layban bi gracyutho dmotina la zedqaydan. Layto noşo dkobelox a’zedqaydox, elo klozım hat drışmatlın udım’aydıt a’folitiqoyaydox. Dlım’aydıt a’folitiqoyaydox du şroro lıgıdqathlox mede. Ino lıksamno qroyto lkul noşo dım’ayadli, elo ktolabno mkul farsufo dım’ayıd a’renye trise, dım’ayıd a’qroytotho wa maqırhınwotho qawye u şarire dkımtalbi ba zedqayde ubi şkihuthayde bu athro, udıktorın dhowe camo hayo xıd dkıtwe meqım 7 alfo ışne. U parlamento qamoyo dıbritho mşataswo bu athro da Şımroye, wu medano kthiwoyo bi musawwada du nomuso esonoyo du Ciraq. I mathlonutho d’camo bu parlamento uba mawtbe da hiğmınwotho sniqoytoyo l’prensibe şarire, sniqoytoyo l’barnoşo şariro u morıd d’idactho folitiqoyto, sniqoytoyo l’mraşho dkito bıthre şutoso folitiqoyo dkibe dmahmele, dmanharle udsoyım u duyoqayde. Elo camıhbol a’mafhumani rahuqene m’hawnıd du camaydan. Adyawma u fulhono demoqratoyo bu Ciraq hawi şrorutho. U ida hat laybox şariroyith dımnaqıt u mathlonaydox, inaqlayo duktho lıkfaşlox b’gawıd du athro, u gıdothe hreno dımmathelox, farsufo hreno dgıdsoyım tagorutho bi sbuthaydox”.

Camgabıdathe, u rişono d’HBA Yusıf Matti dsımle qroyto lu camaydan dmıştawtıf b’şıkıl hfito la guboye da mawtbe da hiğmınwotho du Ciraq, ba melani ste mdawamle “balhude ha qolo dmivayıc du barmothoyo Kaldoyo Suryoyo Othuroyo qentoyo calu dactid du camaydan bu Ciraq. Ino wa rişone hrene da gabe folitiqoye layban dsaymina mede elayxun in dlıwetu haso laşanayna, w’ahna dhowina xda sayfe dkımdafci aclayxun w’alaw ste dhowina a’sohde qamoye du ağuno. Ahna lıkıbcina woliyotho, aw zuze aw bote u radoyotho, elo ahna kıbcina i claymutho dsaymo i rişonuthaydan, cal dkıtyo i claymutho u dactid du camaydan”.