A Haylawotho d’Suriya Demoqratoyto-QASAD, msıklın casro farsufe dıkmıthomi bi marhıbonutho bu madınho du qlimo d’Deyr Ezzor

DAYRO ZCURO – A hayle du Sutoro da Neşe-YPJ cama hayle folhoye di YPG dkıtne hın ma hayle şerşoye d’QASAD, frıslın athmıl mawdconutho cala cuqobe dilonoye dsımlın calu tukoso marhıbono d’Dacış bu qlimo d’Deyr Ezzor-u dilonoyith a krılyotho dkıtne b’al Busyarah.

Cal bi mditathe dkıtne a krılyotho d’Dacış hfite eba, simi a cuqobani ubi netiçe msik 10 marhıbone. U qentrun du tbocofroso da hayle d’QASAD mırle; A Mharbonaydan kıfayşi masre-bu kordinasyon du koalisyon Emwothoyo, dımatimi u tukoso marhıbono u dım’amni i mşaynutho wi şalyutho d’Suriya.

Bebzabno mawdıc, da hayle d’QASAD bıgawe di şatathe sımlın şişaltho d’cuqobe cal Dacış leşan dmaklın a hçome dıksaymi a krılyothayde cala Mharbone ucala mdinoye du athro. Bu tarano’ste yawme d’Tre dşafıcina, maklewole QASAD u tuyobo d’hçomo marhıbono b’Deyr Ezzor. Meqım mano’ste nafılwo Mharbono Sohdo u mınyono d’mdinoye mçarhiwo b’hçomo hreno dsımwole Dacış.

İ xilafe d’Dacış madrıyowa ba 2019, elo a krılyotho dımşatasle kımdawmi a hçomathe u dilonoyith ba zabne haroyani-bi xalyutho folitiqoyto dkito, zayıd naqla hreto u zawcayde b’Suriya. U koalisyon Emwothoyo’ste huwle şudoyo, dımdawım a cuqobayde cam QASAD leşan u qşoco du tukoso marhıbono.