A noqufe d’Muqtada al Sadir simlen athmil tagilyotho mqabil Amerika u İsroyel

BOGHDOD – Athmıl bıthır mi slutho d’Yawme d’Cruto, kfixi a noqufe du zawco Şica d’Muqtada al Sadır la zabuqone b’Boğdod, Bobel u b’Karbala u sımlın protesto a hçome dıksaymo İsroyel calu İran. A tagliyotho mtaybi bu Cıraq, bıthır mi qroyto du rişono Şica al Sadır ubu mamlo d’mşalo du gabo dkıtyo b’Boğdod-İbrahim al Jabri, thımle İsroyel bu dyoşo da zedqe uda prensibe noşoye u mawdaclın u snodathe lu İran. A noqufe dcayni zawco b’Beyrut u b’Tehran’ste, sımlın athmıl tagliyotho.

U rişono ruhonoyo da Şica bu Cıraq Cali al Sistani sımwole mamlo meqım 2 yawme u krıhwole a gzome du mhoyo bu rişono du İran Cali Xamenay u mzaharwole calu qento dgıtore u hçomano calu qlimo kule. Al Sistani krıhwole a hçome d’İsroyel calu İran u tlıbwole mu kenşo Emwothoyo dımçahdi leşan dmitakle u qrobano u dmisafe lfuth a qonune Emwothoye.

Elo u rişono du Zawco d’Al Nujaba dkıtyo masro bu İran-Akram al Kaabi gzımle u rişono d’Amerika Trump u mawdacle dkıtne hadire dmohın ba dukotho d’Amerika dkıtne bu macırbo d’Asia, en dothe dmıhçım cal Cali Xameney. Lo a hayle u loste a diplomat Amerikoye gıdfayşşe duktho mşayanto bu qlimo. Kull gabo dkıtla Amerika esore baroye ulo baroye acmaye-gıdmimodi nişo.

Cayni gzomo fris mi milişya d’Katayıb Hizballah bu Cıraq dmawdacla, dgıdobo funoyo qaşyo la bnaymothoye, la makthbe diplomatiqoye ula şırak Amerikoye-en dothe Woşington dcubro lu qrobano cam İsroyel. Ba 2019, mahıtwola Amerika a 2 ğrobani bi lohithayda di marhıbonutho. Mcal fothe du qrobano’ste, mawdıc dhol 11 alfo Cıraqoye u Kurdoye dkıtwın holucdo bu İran, daciri lu qlimo d’Kurdistan.