A Şica du Iraq bşıkıl cjiqo kımdawmi dmacçızi u camaydan di mdito d’Barıtle

A Şica du Iraq, b’şıkıl cjiqo kımdawmi dmacçızi u camaydan di mdito d’Barıtle di daşto d’Ninwe, bnişo dımşahılfi i hiyoyuthayda i Suryoyto.

Grub d’falohe mu froshezwo d’Alfurat da Şica du Iraq, hçımlın cali cito d’Mort Şmuni da Suryoye b’Barıtle, u mahıtlın i sırto du marıhbono Abu Mahdi Almuhandes camgabe du mgalyun qadişo di cito.

Menyono d’dafe kenşoye du camaydan du Iraq frıslın athmıl video dıkmahwe ebe u mgalyun di cito d’Mort Şmuni da Suryoye Orthodoksoye d’Barıtle, u camgabe mahto i sırto du marıhbono Abu Mahdi Almuhandes dkıtwe u tahlufo du rişono d’Alhaşd Alşacbi du Iraq d’qtılwo camu rişono d’Faylaq Alquds du İran Qasem Sulaymani. A farsufani qtiliwo bu cuqobo oyaroyo dsımwola Amerika ba 2020.

Lfuth i mawdconutho dhiwo me mabuce di cito Suryoyto d’Barıtle li dafo d’Caynkawa, grub d’falohe du froshezwo da Şica hçımlın cali cito dlo mu fsoso da tre kohnayda-qaşişo Yacqub Jıbo dlatwe bu zabnawo b’Barıtle u qaşişo Dawud Duşa dhawi şok ma Şica du froshezwo dmahıtlın i surto du marıhbono su mgalyun di cito d’Mort Şmuni.

Cali sbuthathe qaşişo Duşa bi maqırhonuthayde, mahwele hfuxyo qaşyo u mırle; Farsufe xıdani dıkcubri la bota d’Aloho kımdacın dıkqorın lu şlomo, elo i bcelboboyutho kbışla a lebawothathe wu nişathe bişoyo, wu medano qrihoyo bi kampanyathe i cjıqto. U gunhano dsımle u grub da falohe du froshezwo d’Alfurat, kımamte lu bolo u camlo da Şabak d’Barıtle-dkıtne falqo ma Şica, bi şato da 2011 bu yawmo du cedo du Mawlodo.

U yawmo d’Caşuraa dıkmcaydile a Maşılmone Şica du Iraq cal drakuwo bi şata’yo camu cedo du mawlodo d’Moran Yeşuc Mşiho, grub d’Şabak hçımwolın cali cito d’Yuldath Aloho d’Barıtle, u abici dmahtiwo bıgawe di durto di cito i otho d’Caşuraa. A şabak Şica du Iraq cıl mıd kmitahwelın bote u arcotho d’Barıtle bu snodo du İran, ucdo’ste ba hçome u dyoşe cjiqe dıksaymi, kubci dçıbri u camaydan dımgalwe mi mdito, bnişo dmişahılfo i hiyoyutho Suryoyto d’Barıtle.