Amşihoye kmahzımi mi dukthathe mefothıd da cuqobe dıkseymo Turkiya

‘A Mşihoye kmitawfıqo ma bothathe bu garbyo du Iraq mcal fothe da cuqobe dıksaymo Turkiya calu qlimo a melani di mğaltho Amerikoyto The National’ne.

 Bebzabno u Komisyon mqabıl da taşniqe bu Huyodo d’Urifi frısle taşroro u mawdacle, ba hamış eşne haroyani qtil u mjarıh hol 180 mdinoye bu zabno da cuqobe dsımla Turkiya calu qlimo d’Kurdistan du Iraq.

 Comure da qıryawotho wu mşalo du qlimo d’Kurdistan bu garbyo du Iraq huwlın mawdconwotho li mğaltho Amerikoyto The National, calu husrono dıktorın aclaye a cuqobe dıksaymo Turkiya calu gerila di PKK. İmğaltho mawdacla da cuqobani d’Turkiya dımşarewolın 17 bu yarho dışafıcina, hawın celtho d’ğalabe Mşihoye dmahzımi u dtorın ma bothathe bu qlimano.

Bu tebano i mğaltho mırla; U mede dıkgorış u zuhoro, di kampanyathe dmabdela Turkiya mi naşfe umi hawa calu garbyo du Iraq, da hjomani kmisomi cala dukotho şerşoye da Mşihoye uba qıryawothaniste, layto gerila di PKK. Ha man abne du camaydan u Kaldoyo mırle; Turkiya kmuhyo ba qıryawothaydan bi hıje dkıtla i PKK ithutho ebeye. Elo ba dukothaydan layto gerilla. Jbirina dmahzımina mi qrithaydan u kıfayşina ucdo b’Zaxo.

Cala hjomani d’Turkiya calu garbyo du Iraq, i mşalonitho du Komisyon Amerikoyo di hirutho Emwothoyto da Tawdiyotho Nadine Maenza frısla maqırhonutho u mırla; A hjomani d’Turkiya xlıqlın ğamo rabo, dilonoyith a cuqobani dıksaymi cala dukotho da Mşihoye uda Ezidoye dheş me meqımste midiwo nişo lu qtolğenso da marhıbone d’Dacış. A qalilothani  klozım dıqudri dhoyın bı nihutho ba qıryawothathe.

Me gabo hreno u Komisyon mqabıl da taşniqe bu Huyodo d’Urifi-CPT frısle athmıl taşroro u mawdacle, mu yarho d’Ob da 2015 u holucdo, qtil 85 mdinoye ba cuqobani dsımla Turkiya calu qlimo d’Kurdistan. Bebzabno ba hjomaniste mjarıh 95 mdinoye ban 6 yarhe qamoye di şatathe uba mowat d’qıryawotho maxlın ma comurathe mcal fothe da cuqobani da hayle Turkoye u hiw husrono rabo lu mal ulu mulk du camo. CPT mırle; Lfuth u mede dıkmahwe, Turkiya lıkmaydo tedbire makfıyone leşan dımhamyo a mdinoye du qlimano.