Britania maqbela u vaksin di Corona

Britania, maqbela u vaksin di Corona dısnıcla i şırke da darmone d’Amerika Phizer/Biontech. Bi şabtho dıbqamuthayna, kmıntır d’Britania dımfarqo u darmonano bu athro.

 Bebzabno mşale di wazirutho du hulmono d’Amerikaste mawdace u plan dkıtte dcal qariwo dımfarqi u vaksinano lu camo. Elo camatheste kmitawdıc, du kewano di Corona kımdawım dhowe celtho lu mawto dban alfayo dıbnaynoşo bı britho.

Lfuth u waziro du hulmono d’Britania Matt Hancock, i şultonutho maqbela adyawma ruşmoyith u fusqono di Sictho du hulmono dmawdela bu vaksin d’snıcla i şırke Amerikoyto Pfizer/Biontech. Mawdıc d’Britania gdımşaryo bi şabtho dıbqamuthayna bu feroqo du darmonano la bnaymothoye du athro.

Bu şıkılano, hawyo Britania u athro qamoyo bı britho dıkmaqbıl u vaksinano d’Pfizer dmahwele dkımsaytır b’hol 94% mqabıl d’Covid-19. Bebzabno u Swedste mdele bu darbo du Huyodo d’Urifi qyomo cam Pfizer, leşan u zwono du vaksinano l’2.3 milyone barmothoye.

U Swed mıdeleste qyomo cami şırke Swedoyto-Britanoyto Astra Zeneca u cami şırke Beljikoyto u Amerikoyto d’Jansen. Hathe kuthyo li mıcne, dgıdhowe vaksin makfıyono la comure du Swed kulle. Me gabo hreno mşale mi wazirutho du hulmono d’Amerika athmıl mawdaclın dkıte plan, dımfarqi ba kımo yawme dıbqamuthayna u vaksinathe bu zabno dıkcole u mınyono da mithe bu athro. Holi harayto di şatathe, kmıntır dhol 20 milyone Amerikoye dmihafdi mu virusano.

İ mawdconuthathe hiwo, bıthır mıd 2.295 farsufe nqili ma haye mu kewano bu athro. Hol athmılste kıtwo 96 alfo bnaynoşo kayiwe ba bethkrihe d’Amerika u belhude bu yarho dşafıcina, nqılwo 37 alfo bnaynoşo ma haye bu athro. Gawonoyith b’190 athrawotho dı britho, tafi u virusano l’64 milyone dıbnaynoşo; 41.2 milyone nayıhlın mene u hol 1.48 milyone nqili ma haye.