Fatıryarxo Yunan sımle u qudoşo di cito d’Altahira bi mditho d’Bağdede

B’zawho ruşmoyo u camonoyo, mqadşo i cito d’Yuldath Aloho d’Altahira Alkubra da Suryoye Qatholiqoye bi mditho d’Bağdede di daşto d’Ninwe.

U zawho du qudoşo dımrayşanle u fatıryarxo Mor İğnatiyos Yusıf Tlithoyo Yunan, mıştawtaflele rişone ma citotho mşahılfe du camaydan du Ciraq, mşale u mdabrone da şutose d’Bağdede, uba mowat dımhaymne mu camaydan di daşto.

 Yawme dı Cruto dşaficina, i qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan, mrayşanle u zawho du qudoşo di cito d’Yuldath Aloho d’Altahira Alkubra bi mditho Suryoyto d’Bağdede bi daşto d’Ninwe. Lu zawhano mıştawtafle hsayo mi cito Suryoyto Ortodoksoyto umi cito Kaldoyto d’Bobıl, u rişızgado du Vatikan bı Boğdod hasyo Mitya Liskovar, kohne di marcitho d’Mawsal u hedora, u menyono celoyo dı dayroye u dayroyotho, mşale mdinoye u folhoye d’Bağdede uba mowat dımhaymne mu camaydan dıkfixi cali cito.

Bu zawhano, fatıryarxo Yunan mşıhle u madhıbho di cito d’Altahira, a’şurone wa tarcayda kulle bu mirın mqadşo cam nqoşkafe u hulhole da neşe.

Bi koruzutho dsımle Mor Yusıf Tlithoyo Yunan, mawdacle di cito d’Altahira dıshifowa, dmawqıdowa udımlakhowa ma marıhbone i şato da 2014, sim ucdo u

qudoşayda bıthır mıdkamili a’fulhone du hethothayda, u mırle “i bartho du malko şxısla ruha m’hatho, laşan dmawdıco di towutho zaxyo cali bcelboboyutho, i mdinoyutho zaxyo mqabıl di saxlutho wi hubo matımla u ruğzo. Ahna adyawma b’gawıd di citathe dımqadşo bu ışmo d’Yuldath Aloho d’Altahira, kcayşina feshutho ruhonoyto rabtho, dilonoyith cal di citathe kımmathlo i jawhara yaqirto mbayn da citotho mşahılfe du Iraq uda citotho Suryoye dıbritho. Bıthır mu haşo dathi brişawxu hatu an’abne u bnotho d’Bağdede dluwewolxu haymonutho lıgıdıcrituwo m’hatho li mdithathe”.

Bebzabno, fatıryarxo Yunan grışle u zuhoro cal 60% mu camaydan daciri li mdithaththe d’Bağdede, u mawdacle du menyonaththe kımmathıl u menyono rabo dkulle mbayn da Mşihoye galwoye du Iraq.

Camgabıdathe, fatıryarxo Yunan dıgrışle u zuhoro calu qubolo rabo dsımwo li qadişutho du papa bı Bağdede, mawdacle ste da fulhone du bnoyo di cito d’Altahira Alkubra grışwolın 16 ışne mi şato da na’1932 huli şato da na’1948.