Ğrob d’yaminoye tuhmonoye d’Hollanda, hçımlın calu bınyono di karxutho d’Loosdrecht bıthır mıd mbayın xıd nuqazto hathto la galwoye

LOOSDRECHT, Hollanda — Yawme d’Tlotho casriye, hçımle ğrob d’yaminoye tuhmonoye calu bınyono catiqo di karxutho d’Loosdrecht, bıthır mıd mbayın xıd nuqazto hathto la galwoye. U hçomo sim, bıthır mıd markıwi a 15 galwoye qamoye bu bınyonano. Bi taklithathe dsimo, a tuhmonoye mıstacmelın foqucotho d’rişe di şato u mhaqlıq maşalat cali duktho ubi netiçe dqdiho nuro bu bınyono.

A falohe di Tıffayo dazzın xayifo li duktho, lo trelın a mtagliyone dımqarwi lu bınyono u matfelın i nuro ubi netiçe’ste a 15 galwoye dkıtwın ebe lo mçarhi. U polis Hollandoyo’ste mawdacle dımsıkle mınyono ma mtakliyone u jbırle a hrene dmıgroşi mi duktho. A takliyothani mqabıl di nuqaztathe da galwoye latne a qamoye u hani şabe kımdawmi.

U plan di karxuthathe dkıtla 8.600 comure, bu şuroyo dımarkıwo 110 galwoye’we elo bıthır ma hfuxyani, manqıs u mınyono l’70 galwoye. La takliyothani, hadır’ste folitiqore di karxutho dtlıbe dmitadcıri a galwoyani lan athrawothathe.

U gabo da Mşihoyedemoqratoye di karxutho-CDA, thımle a mtakliyone b’qedomo du hawbo u mırle; Laybe dhowe hawxa mede bu athraydan-du ha dıkmacle qole zıttır mu hrene, dmafıt u talabayde la haye-talabe dkıtne da hayobe.