Hthim u ştand da muklone marduthoye du cameydan bu cadcido da flime b’Locarno
31 bu yarho d’Tamuz sımwo u futoho du ştand da muklone marduthoye du cameydan bi mdito d’Locarno d’Swisra bu wahdo dıkmitayıb kull şato u cadcido Emwothoyo da filme. Bu cadcidano dkıtyo da 78 dıkmisım, kmitahwe’ste aftho la şutose du Mawtbo Umthoyo d’Bethnahrin dfuthi ştand u dfursi a muklone marduthoye du camaydan.
LOCARNO, Swisra — Adşato’ste markawolın a şutose du Mawtbo Umthoyo d’Bethnahrin u ştandathe bu cadcido Emwothoyo da flime bu kanton d’Locarno d’Swisra. Cal du camo nuxroyo kobe yasifutho lu ştandano, kmitahwelın a şutose du camaydan kull şato duktho bu wahdano du cadcido.
Bu ştandano, a şutose du camaydan dıklaymi me mdinotho frişe-camgabe da muklone dıkmzabni, dkobın’ste mawdconutho calu cameydan du athro udi golutho ubi netiçe du fulhonano, kmısnıd’ste u cameydan du athro momunoyith. Athmıl’ste u yawmo haroyo du ştandano’we dşafıc b’tacbo rabo elo bebzabno’ste b’moral celoyo wi hiw calaqa rabtho ma came nuxroye la muklone marduthoye du camaydan.
Bi harayto’ste sim u muroyo da flime dfrisi bu cadcidano u mfarıq u şukono du Nimro dahbonoyo-dkıtyo u remzo di hfituthathe. U cadcidano, mşarewo bu tuyobayde heş ban 1946 b’Locarno. Bıgawe du zabno mşawşıt u hawi u cadcidano da 78 dıkmisım adşato, ha ma munasabat rabe dbritho la mıştacyone u sayome da flime uda dokumentare.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
