I Mdabronutho Yothoyto Demoqratoyto u i şultonutho d’Suriya gıdhowelen ytawto b’Paris calu dactid du athro

SURIYA — 25 bu yarhano dı Tamız, Suriya, Fransa u Amerika bu buyono mşawtfo dıfrıswolın mtewo l’awyutho dmitayıb bu zabno qariwo dkulle ytawyotho hathe bayn di şultonutho d’Suriya wa haylawotho d’Suriya demoqratoyto d’QASAD bi erişkoyto dı Fransa bı Paris, bnişo dmıdrış b’şıkıl kulonoyo u qyomo d’10 Odor dımdewo bayn du rişqutno d’Suriya Ahmad Alşarıc wu rişono gawonoyo d’QASAD general Madhlum Cabde. A’ytawyothani dıkmıntarwo dmisomiwo yawme d’Cruto dşaficina, mşawhıri l’celotho dlatwın idice. 

Cali sbuthathe, u malolo di taşdarto di mdabronutho yothoyto du garbay madınho d’Suriya dıksaymo bazare cami şultonutho dı Darımsuq Yaser Alsulayman, bi maqırhonutho dilonoyto dhule li dafo d’North Press, mawdacle du knuşyo d’Paris bayn d’QASAD u Darımsuq gıdhowe bi rocyutho dı Fransa ud’Amerika ubalki ste Britania, u mırle “a’tre gabe awkith i mdabronutho yothoyto wi şultonutho d’Suriya cal qariwo gıdyutwi bı Paris, bnişo dmıdrış aydarbo kibe dmitafıt u qyomo d’10 Odor la haye, u aydarbo kibe dmibayno i tahrazto dhowın a’haylawotho d’QASAD falqo mi wazirutho du sutoro d’Suriya”. 

Alsulayman bi maqırhonuthayde mawdacle ste du knuşyo d’Paris bayn di mdabronutho yothoyto u Darımsuq mşawhır calu talab dhawila i şultonutho d’Suriya mi celtho di aykanoyutho haruto di mşaynutho bi hiğmonutho d’Sweda. 

Camgabıdathe, Alsulayman mawdacle da comure du garbay madınho d’Suriya kıtlın talabe dfayşi a’haylawotho d’QASAD b’gawıd du qlimo, udmitahwelın garanti emwothoyo bi sbuthathe. 

Alsulayman grışle ste u zuhoro cala tebe dıkmıfrosi tarıs dıhdode ba şutose du tboco froso cali sbutho du intigrasyon d’QASAD ba şutose ruşmoye d’Suriya. Bu tarano, Alsulayman mawdacle du knuşyo d’Paris gıddorış aydarbo kibe dhowın QASAD falqo mi wazirutho du sutoro d’Suriya, lo aydarbo dmasılmi ruhaye awste u zaynaththe awkith u intigrasyon latyo i mıcnayde d’QASAD gıdmaşılmi ruhaye l’Darımsuq.