30/05/2020

I senatore d’Australia mdela maqırhonutho du snodo di mawdıyonutho bu qtolğenso d’1915

I senatore d’Australia Larissa Woters mdela maqırhonutho du snodo di mawdıyonutho bu qtolğenso dsim calu camaydan, calan Armınoye ucala Yawnoye ban 1915 mi mamlaxtho da Cuthmanoye.

 Bi maqırhonutho du snodano dımdela i senatore, kmıtlıb di şultonutho dmıctarfo ba qtolğense da 3 camani.

Bu yarho d’Şbot dı şafıcina, mşakalwo İnsiyatif mşawtıfo di kinutho bu parlamento d’Australia leşan u mdoyo d’maqırhonutho dımtaybowa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

Calathe ucdo, i senatore mu gabo da Yaroqe d’Australia Larissa Waters mdela i maqırhonuthathe u makadla u snodayda leşan u athro kule, dmawde bu qtolğenso dsim calu camaydan, calan Armınoye ucala Yawnoye bi şato dan 1915. Waters dkıtyo i mcadronitho du rişono du gabayda, mnaqyowa naqla hreto lu senato ba 2018 wu gabayda da Yaroqewe, dtlıbwole mi şultonutho federaloyto d’Australia, dmıctarfo bu Sayfo.

Waters dkıtyo mathlonitho di marcitho d’Queensland, hfıtoyo ba şwole du kenşo uda galwoye ucalu snodano dmahwele li sbutho du qtolğenso, an Armınoye, u camaydan wa Yawnoye mqadamlın a tahınyothathe li senatore Waters, dhawyo hdo me beyn d’6 senatore frişe dıksundi i maqırhonuthathe.

Cal qariwo, gıdmımdoyo i maqırhonuthathe me ğer hadome du senato. 25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dbritho.