10/10/2020

İmdabronutho Yothoyto fsıqla dobo şbuqyo la bnaynoşo hbişoye

İmdabronutho yothoyto demoqratoyto du garbiyo u du madınho d’Suriya, fsıqla dobo şbuqyo gawonoyo la hbişoye dsımlın hawbe meqım mu siqumo d’10 bu yarhano.

 Bu fusqono dmıdla i mdabronutho yothoyto, mawdacla du şbuqyano lıkşofıc cala hadome du tukoso marıhbono d’Dacış yaste dkıtne goşuşe u masre cama grube mzayne İranoye u du rejim d’Suriya.

 A Haylawotho d’Suriya Demoqratoyto adyawma fsıqlın dobın şbuqyo gawonoyo la hbişoye dsımlın hawbe meqım mu siqumo d’10 bu yarho d’Teşrın u Qadmoyo da 2020. Bu fusqono dıfrısla i Mdabronutho Yothoyto bi dafayda du facebook, mawdacla lfuth u mluo trayono du Mawtbo gawonoyo di Mdabronutho, u msomrişo du hbuşyo aminoyo gıdmitanqıs l’20 eşne, u msomrişo du hbuşyo zabnoyo gıdmitanqıs lu falgo du zabno wu hbişoyo dkıtyo kayiwo b’kewo gıdmıcfe mu hbuşyo aminoyo yaste zabnoyo.

Bebzabno, u hbişoyo dımkamele 75 eşne gıdmıcfe mu hbuşyo zabnoyo dkıtle.Lfuth u mluo da 3’yo, u fusqono du şbuqyo lıkşofıc cala hbişoye dı thimi bi goşuşutho, bi nxilutho, bi tagorutho da gelone mtanwone u bı gunhe du neshono.

Bebzabno, u mluo 3’yo kmawdıc du şbuqyo lıkhobış bgawe a rişone, a amire, a mdarşone wa hadome da tukose marıhbone mşahılfe dmıştawtaflın la taxtuşe ula hjome da furqoce. Bebzabno, u şbuqyo lıkhobış bgawe a yasire da hayle d’QASAD dkıtne hadome b’Dacış yaste dkıtne masre cama grube mzayne İranoye u du rejim d’Suriya u dsımlın goşuşutho ba cuqobe haroye dmabdewolın a hayle d’QASAD bu kroxo dcala marıhbone ba qıryawotho du madınho d’Deyr Ezzor.

Camgabıdathe, u fusqono du şbuqyo gawonoyo kşofıc cala thimoye dmahzamlın mi kinutho, elo bşart dmasılmi ruhaye b’zabno d’60 ida dkıtne ba fenyotho di Mdabrontuho Yothoyto u bızabno d’90 yawme ida dkıtne larwal da fenyothani.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…