İsroyel simla hçomo cal cito Qatholiqoyto b’Ğaza

ĞAZA — I fatıryarxutho di cito da Latinoye b’Urışlem, makadla dıqtil tre farsufe b’hçomo dsim cali cito Qatholiqoyto d’Roma bu qlimo d’Ğaza. I fatıryarxutho da Latinoye dkımdabro i cito di İqartho Mqadaşto b’Ğaza bu buyono dıfrısla mırla “ktılbina m’Aloho dımhaselın, udmatım u qrobano u barbroyo. Layto ulo celtho la hçome dıkmisomi cala mdinoye dlatlın htitho”. 

Meqım mathe, i fatıryarxutho Latinoyto bu buyono dıfrısla mawdacla dsim hçomo cali cito di İqartho Mqadaşto b’Ğaza bu hçomo oyaroyo dsim adyawma safrayto. Bu buyonayda i fatıryarxutho mawdacla ste dkito menyono d’mçarhe, baynothaye u kohno di marcitho qaşişo Jubrael Romanelli. 

Lfuth u ajans da tebe d’Fleşt d’WAFA, tre barmothoye Mşihoye mçarhi u mçarıh ste şawco hrene bu hçomo dsim adyawma b’tayisyotho İsarloye dlo pilot cali cito da Latinoye dıksaymo baytoyutho l’galwoye bi mditho d’Ğaza. 

Ba hfuxye dmahwın cali sbuthathe, i rişathwazire d’İtalia Jorjia Miloni bu buyono dıfrısla mawdacla d’İsroyel mıdla ste nişo ela ba hçomayda i cito di İqartho Mqadaşto, u mırla “a’hçome dıksaymolın İsroyel cala comure mdinoye m’zabno hani d’yarhe lıkmitaqıbli. Laybe ulo hçomo folhoyo d’obe fuşoqo lu qedomano”. 

M’gabo hreno, i wazirutho di baroyutho d’İsroyel bi maqırhonutho dıfrısla bi dafayda d’X mawdacla, d’İsroyel lıkhıçmo cala citotho aw cala dukotho tawdithoye, utlıbla şubqono mu husrono dhawi li cito ula barmothoye dlaltlın esore camu qrobo dkito b’Ğaza. I baroyutho d’İsroyel mawdacla ste du gayso ksoyım ucdo buqore bhaq du hçomano dheş latne a’şartatayde qrihe, ub’şıkıl şafyo gıdmıfroso i netiçe da buqore.