İtalya u Yawnan mahwelın hfuxyo mqabıl Turkiya cali sbutho d’Ayasofia

Folitiqore, mşale tawdithoye frişe b’İtalya ubu Yawnan, krıhlın u qedomo d’Turkiya li cito d’Ayasofia wi slutho dsimo athmıl bıgawa. A Maşılmone d’İtalya mırlın; U haylo wu siyase di şultonutho d’Ankara’yo, bıthre du şuhlofano d’Ayasofia l’masığdo.

 U malla d’Milan d’İtalyaste mırle; Ayasofia lıklozım dhuwyo lo bethcatiqotho u loste masığdo. Ayasofia dkıtyo 1.500 eşne catıqto klozım dfayşo xıdu mede dkıtwa meqım cito da Mşihoye!.

Hani zabno, kımdawmi a hfuxye mqabıl di şultonutho d’Turkiya udu fusqono dmıdla, dmişahlıfo i cito catıqto d’Stanbul d’Ayasofia, l’masığdo. İ citathe dkıtyo li lohitho d’UNESCO u dsimowa bethcatiqotho ban 1934, athmıl msalelın a Maşılmone eba awıl naqla bıthır 86 eşne.

Cali slutho dsimo athmıl b’Ayasofia mahwe hfuxye Emwothoye wu malla d’Milan Yahya Pallaviçini mırle; Ayasofia dkıtyo 1.500 eşne catıqto ubi lohitho d’UNESCO, klozım dmıtroyowa xıd kıtwa bu şuroyo xıd cito. Lıklozım lo dmisomowa bethcatiqotho uloste masığdo Ayasofia citowa u ono mu yawmo qamoyo mahıtli i klaytaydi bi sbuthathe. Bu makthabzabno, a yadıcthone di Maşılmonuthoste myaqriwo a dukotho di slutho da tawdiyotho hrene. A dukotho di slutho klozım dfayşi xıdu mede dmacmıri bu şuroyo u dlo mibadli.

Camatheste mathlone di cito Qatholiqoyto b’İtalyaste sımlın sturyo Erdoğan calu fusqonano u hasyo Ettore Malnati mırle; Ankara idictoyo ba camlani dıksaymo. Kımısko kull noşo dlatyo bu renyayda u hano mede dıkxolıq ğamo raboyo. Turkiya klozım dhuwyo sekuler, demoqratoyto u dımyaqro u kenşayda wu zedqo di hirutho tawdithoyto. U fusqonano d’Erdoğan, egarthowa la Mşihoye dlatle tolerans li tawditho.

Me gabo hreno bu Yawnan, simo i slutho b’Ayasofia protesto wa noquşe da citotho du athro kulle dıqlın athmıl. Bu duxrono da 46 eşne du terkiwo di demoqratoyutho bu Yawnan, u rişwazire Kyriakos Mitsotakis sımle mamlo u thımle Turkiya dkıtyo athro dbelhude kxolıq qetre u bcelıdbobutho. Mqabıl di klaytathe du Yawnanste, u malolo di wazirutho di baroyutho d’Turkiya Hami Aksoy sımle Athena sturyo u thimole dkıtyo mqabıl di tawditho Maşılmonitho.