Magle cala dugle d’Erdoğan bi sbutho d’İMF

U mdabrono catiqo di banka qentrunoyto d’Turkiya dkıtyo u tahlufo di rişonutho du gabo d’İyi-Durmuş Yılmaz mdagele u rişqutno Erdoğan dkomır i banka dıbritho tlıbwola dayno me Turkiya.

 Ba yawmotho dşaficina inaqla d’Erdoğan hule funoye la sturye du rişono du gabo DEWA-Ali Babacan mırle; Ba zabne dmeqım, i banka dıbritho İMF tlıbwola 5 milyare dayno me Turkiya.

 Ba yawmotho d’şaficina u rişono du gabo DEWA Ali babacan dsımle wazirutho du momuno bu zabno di şıltonutho d’Erdoğan sımwole sturyo i şıltonutho ducdo u mırwole u momuno du athro nahıt lu darğo tahtoyo di şıltonutho fayış ktılbo zuze mu camo.

Bhaq da sturyani u rişqutno Erdoğan hule funoyo l’Babacan dmahkele bi şato da 2012 i banka dıbritho tlıbwola 5 milyare dolare me Turkiya dayno ucdo mınyo Babacan dıksoyım sturyo i siyase du momuno dkıtlan.

Bıthır mi maqırhonuthathe du rişqutno u tahlufo di rişonitho du gabo d’İyi Meral Akşener Durmuş Yılmaz mırle layto hawxa mede İMF i banka dıbritho lı tlıbla dayno menan u mamlano dugleyo layto şrolutho ebe. Durmuş Yılmaz dkıtyo ucdo u tahlufo di rişonitho d’İyi bu zabnawo dıkmitahke acle hiyewe u mdabrono di banka qentrunoyto du athro d’Turkiya dhowewo mede hawxa hiye gıdhowewole tebo.

Bebzabno dmawfaqle Erdoğan mdaglono frısle warqo dıkmahke ebe a talabe dhawın mi banka qentrunoyto d’Turkiya dılayto mede hawxa bi sbuthathe. Bi sbuthathe Babacan mırle bu zabno dmeqım da ışne 2012 u 13  u ekonomi d’Turkiya bdarğo dkıbwole mdayın zuzewe elo ucdo i şıltonutho kobo u konto du athro lu camo dobe mcadronutho lu athroyo.