Matti u Sliwa mahwelın hfuxyo mqabıl du tehriwo du şuro maktabzabnoyo d’Ninwe

Adyoma u rişono du gabo du huyodo d’Bethnahrin athroyo d’HBA Yusuf Yacqub Matti camu qoyumo catiqo du cameydan Jusef Sliwa mtayablın knuşyo gılyunoroyo dmahwelın ebe u hfuxyaththe mqabıl du tehriwo du şuro maktabzabnoyo di mditho d’Ninwe.

Bıthır mi maqırhonutho dhuwole Jusef Sliwa u athmıl u rişono d’HBA dsımwole buhono cam video calu tahriwo du şuro d’Ninwe, adyawma ste u tboco froso latım laşan dşomıc a’hfuxye da tre farsufani.

Yusıf Matti

Ahna ucdo kalyena qum du şuro d’Ninwe u qariwo mu tarco d’Nergal. Meqım mkul mede i egarthaydi hatheyo: u dyoşo da n’athrae dyoşo calu camo du Iraqyo. Dlo fuşoqo layto bıbritho ulo qonuno dıkmahme u barnoşo dıksoyım dişutho bhaq da n’athare. U ida dkito hın hayle dıktılbi ruşmoyith mi mdabronutho da n’athare dmaqıblo u medano ahna krıfdinale u kmawdıcina du medano dyoşoyo ste li mdabronutho da n’athare. İ yortuthathe i tibeloyto dıkmote cımra l’hedor 4 alfo ışne, u harke mqafe u macıbdo d’Aded, u Ninwe kıtwola ithutho heş meqım ma dore da n’Othuroye, elo an’Othuroye dilonoyith u malko Sanharib mkamewola u bnoyayda i şato da 900 meqım mu mawlodo d’Mşiho u hıwwewe dıbnewole u şurano u mramrımo. Adyawma qum d’caynothıd kulle a’noşe kmıqşıc u şurano u kmidış. Klozım i mdabronutho di karxutho d’Mawsal dlımaqıblowa u ftoho du zabuqano. Ahna m’dukthayna marke ktılbina mu rişqutno du Iraq, mu rişwazire mu rişono du parlamento umu hiğmuno d’Ninwe dmitaklın a’fulhone du tehriwo du şuro d’Ninwe bi dacwa du ftoho u hethotho du zabuqo.

Josef Sliwa

 Adyawma kalino cali şrorutho da tebe dıkşımcinalın ba dafe kenşoye d’Ninwe. U makthabzabno du şuro mramrımo d’Ninwe kmidış adyawma b’şıkıl cjiqo. Ino balhude hamşo mıtrowiye kfırşili mu şuro. A’fulhone du dyoşo qrihene, wa makinat dy şmoto da kefe mawbıli marke laşan dmıtle u gunho. Bi egarthayde lu rişwazire Mustaf alkadhimi komarnole: ida Iraqoyo hat nfaq moro lu makthabzabno du athraydox udi yortuthayde dıkmidoşo ucdo. ksaymina qroyto l’Alkadhimi ulu waziro di mardutho dmaklın i tarmithathe hul dmişatıs sictho da buqore calu medano. Ahna lıgıdmaşlena ruhayna u gdımdawmina dmaglena i şrorutho.