Mawdıco i casqutho dıkceyşi amşihoye du Madenho Mescoyo

U mawtbo da citotho du madınho mescoyo, mawdacle du nfoqo du moro li ithutho Mşihoyto bu madınho mescoyo kımathıl i casqutho rabtho dkule dkito adyawma qum da citotho du qlimo.

 Megabo hreno, u şutoso d’Open Doors mawdacle da Mşihoye kowın u debho da rejime diktator dı britho dıkmohın bido qşitho aqole dkıtne saqıbloye.

 U notarrozo gawonoyo hatho du mawtbo da citotho du madınho mescoyo Mişel Cabas, bi egartho dımşadrole la rişone da citotho u la hadome du mawtbo kule, mawdacle di sbutho du nfoqo du moro li ithutho Mşihoyto gawonoyto bu madınho mescoyo kımathlo i casqutho rabtho u asasi dkito adyawma qum da citotho du qlimo. Cabas mawdacleste di Mşihoyutho bu madınho kibe dmınfaqla moro bu darbo di methcadronutho bayn da citotho mşahılfotho d’Mşiho, u mırle “laşan dmınfıq moro la Mşihoye bu cafraththe, klozım dmisım fulhone ğalabe rabe dlısimi heş hul ucdo. Klozım dmaydina li ido darbone hathe dıkşowın lu darğo di casqutho dkito. U hethotho ruhonoyo, i tarbitho wi mardutho Mşihoyto hani kulle medone asasine laşan dmahwiyo i Mşihoyutho mrodo udımdawmo dfayşo cali rağlo, elo ahaye kıtlınste xasra maddi dlaybe ha dmacmıd caynothe macla xıd mathlo kito sniqutho lu bayto, lu hulmono, li sınca u lu yulfono”.

Megabo hreno, u malolo du şutoso d’Open Doors Ron Makmelan sımle qroyto la Mşihoye dmıştawtıfi acmaye li slutho dgıdmitaybo bi harayto di şabthathe, laşan dmitahwe awyutho cama Mşihoye dı britho. Makmelan dımzaharle da haye hawın i şatathe qşeytır li ğalabe Mşihoye dı britho ba melaniste mdawamle “i şato da 2020 latyo balhude i şato du virus d’Corona, elo 2020 hawyoste i şato dımşahılfo eba britho liduktho dzayido eba i daktatoriye u dnaqıs eba u şbuqyo. Covid- 19 hule aftho la nathrawotho camonoye popular u diktator dımthabti i şultonuthaththe u dlohın aqole saqıbloye”. Mede mahişonoyo da qalilwotho dı britho xıd mathlo a’Mşihoye hınnene dkobın u timo du medano. U malolo d’Open Doors dmahkele cali aykanoyutho da Mşihoye bu Sin hawxa mırle “i cito du Sin dıkmote u menyono da hadomayda l’zıd me 100 malyune d’farsufe, klozım dımbayzıro calu hboso dkowe acla, bnişo dmitafıt u ideoloji du gabo da Kominist ba egrotho u ba koruzwotho di cito”.

Mxasra hreto, i qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan, mi celtho di aykanoyutho qşitho dıkşofıc eba u athro d’Lebnon cfele ayolufe da madraşyotho dilonoye di fatıryarxutho mu tehwiyo da zuze dıknıfli aclaye mqabıl du yulfonaththe ham ba nışne dşaficina u hamste bi şato da 2020 u 2021. Bebzabno, fatıryarxo Yunan tlıble ma nabne di marcithayde dımqaydi anabnathe ba madraşyotho di fatıryarxutho laşan dqıdro i cito dımcadrolın dımdawmi u yulfonathe ba şartat casqe ducdo. Lfuth u fusqono dmıdle Mor Yusıf Tlithoyo Yunan, anabne di marcitho Suryoyto dkıtne mqayde bı madraşyotho hrene dlatne masre cami fatıryarxutho, kibın dımrajci akohne da marciyotho laşan dqathlın mcadronutho ida dhowelın casqutho bu haqlo momunoyo.