Maykel Roben tlıble dmitahıt tedbire mqabıl Turkiya

U mşalo catiqo bi wazirutho du sutoro d’Amerika du Pentagon Maykel Roben, tlıble me Amerika, me Urifi dmahti tedbire mqabıl dı Turkiya, cal dıksındo a’grube marıhbone b’Suriya.

Camgabıdathe, Roben bi maqırhonutho dhule lu tboco froso mahwele ilothnihuthayde mu qedomo rafyo d’Urifi, du rişono Amerikoyo Donald Trump wu mathlonayde Jeyms Jeffry mqabıl da dyoşe dıksaymolın Turkiya.

İ wazirutho du sutoro d’Amerika u Pentagon meqım kımo yawme bu taşroro hatho dıfrıswola, mawdacwola dı Turkiya heş kımdawmo dhuyo i nuqazto rişoyto du cboro dı Dacış la nathrawotho d’Suriya wu Iraq u ğer athrawotho bu qlimo du madınho mescoyo.

Cali sbuthathe, u mşalo catiqo bu Pentagon Maykel Roben bi maqırhonutho dhule l’Hawar News, mawdacle laşan dmimıd hşowo m’Turkiya klozım Urifi dmıhyo dharbo li şultonutho d’Anqara, u mırle “laşan i darhbathe dhuyo qşitho, klozım baroyo dmakle u Huyodo d’Urifi dobe fsoso la xtute oyaroye Turkoye dcıbri la botaytawso du Huyodo. Uklozımste dmakılyo Urifi afyore oyaroye kulle la lmine Turkoye dkıtne bu yamo d’İga ubu yamo Mescoyo”.

Bebzabno, Roben mahwele dlatle sabro rabo dmıkle b’qamuthıd dı Turkiya, cal da Urifoye ğalabe zacifne qum da tehdide d’Erdoğan dfotıh athumayde qum da galwoye dşıfci lu Huyodo d’Urifi.

Camgabıdathe, Roben mawdacle du taşroro dıfrıswole u Pentagon kmahwe di wazirutho di baroyutho d’Amerika kımqadmo l’Turkiya xıd athro bnayqyomo lo xıdu qedomo dıkmahwele u Pentagon, u ba melani mdawamle “i wazirutho di baroyutho d’Amerika lkımathlo i siyase baroyto harayto du athro, mawxa i naqla di wazirutho di baroyutho dmıstoro camu Pentagon, u Qusro Heworo kowe xıd dayono bayn da tre şutose. Ubi sbuthathe Jeyms Jeffry kibe dımmaşe siyase da dugle, elo ucdo u bşıkıl zyudo latle tuxlono mi sagiyutho da hadome di mdabronutho d’Waşington”.

Cali sbutho di mwatyutho bayn Amerika u Turkiya, Roben mawdacle dıkmıtyaqın d’Waşington gıdmahto tedbire cal Anqara, elo xıd funoyo lu mahwo şqolo dı Turkiya camu athro d’Rusya ulo l’mede hreno, mawxa i mdabronutho yothoyto klozım dsaymo hboso laşan u garanti dlıfılto Turkiya ma msomrişe.