Mcayıd u şahro d’Yoldath Aloho b’Turcabdin

TURCABDIN / BRITHO — U camaydan dıkhoye bu athro ubi golutho, kull şato kımcayıd a şahre da qadişayde. Ha mani’ste u şahro du şunoyo d’Yuldath Aloho’yo, dsim athmıl bi dayro d’Mor Gabriel b’Turabdin. Lu şahrano, layım mınyono celoyo mu cameydan dıkhoye bu qlimo u acme’ste u camo dıkcoyış bi golutho dkıtyo ucdo b’socurutho bu athro.

U lalyano mşarele bi slutho dımrayşıno mi mcalyutho du hasyo Mor Tematheos Şmuel Akataş cama kohne şamoşe dhadiri. Bu mamlo dsim’ste kle cali mıcne du şahrano ucali ulsoyutho du camaydan dımdawım dmathkır a qadişayde kulle. Bi dırto di dayro’ste fris tabliyotho la hadire, aclaye cenbe xıd remzo du yawmano u barxo.

Me gabo hreno u camaydan b’Beljika’ste mcayadle u şahrano d’Yuldath Aloho, dsim bi cito d’Yuldath Aloho dkıtyo b’Bruksel bi mtaybonutho dcame Mşihoye hrene. Lu şahrano, dımaqım teşmışto mi mcalyutho du hasyo di marcitho Mor George Gawriye, camu kohno di cito Abuna Sabri u kohne hrene dhadiri me dukotho frişe du athro cam mınyono celoyo d’şamoşe u şamışyotho.

Ba mamle dsimi mqadım tawdiyotho la hadire u mawdıc; Xıdu cyodo dkıtle u cameydan, klotım lıhdode ba citotho leşan dmıstaqbıl u şahro d’Yoldath Aloho bnişo dımqadım a talabayde mi emo d’Mşiho. U şahro dhthim ba qole citonoye dımzamri u sim’ste dawra u tcin u hayklo d’Yuldath Aloho bu zabuqo di mdito ubi harayto’ste hawi gado, du camo dloqe u dmıfsıh camhıdode.