Mor Awwa Roil mnaqe fatıryarxo li cito d’Madınho d’Othuroye

U efesqufo di marcitho du macırbo d’Amerika di cito d’Madınho d’Othuroye Mor Awwa Roil, mnaqe fatıryarxo hatho li cito me darbe di qadişutho du fatıryarxo Mor Gewargis III Sliwa dmıstacfele mi wolithayde mi celtotho du hulmono.

U fatıryarxo hatho Mor Awwa Ro’il dmawlıd bu athro d’Amerika, gıdyotu ruşmoyith calu kursiyo fatıryarxoyo b’zawho ruşmoyo dgımitayıb 13 bu yarhano bi cito d’Mor Yuhanna Macımdono bi mdito d’Caynkawa bu Ciraq.

I Sunados qadışto di cito d’Madınho d’Othuroye, athmıl bu yawmo 3’yo da ytawyothayda d’qtiri bu qentrun fatıryarxoyo b’Caynkawa, mawdacla du rişono di marcitho d’Kalifornya du macırbo d’Amerika efesqufo Mor Awwa Ro’il mnaqe fatıryarxo hatho li cito bıthır mıd mıdle i sagiyutho da qole da hadome di Sunados. Ubu şıkılano Mor Awwa Ro’il hawi u fatıryarxo da 122 di cito d’Madınho d’Othuroye me darbe di qadişutho du fatıryarxo Mor Gewargis III Sliwa dımıstacfewole me celotho du hulmono ba 2020, bıthır mıd sımle mşablonutho d’6 ışne li cito.

I masırhonutho du fatıryarxo hatho di cito d’Madınho d’Othuroye, kmıntır dmisomo bu cedo du Slibo dıknofıl 13 bu yarhano, bi cito du qadişo Mor Yuhanna Macımdono bi mdito d’Caynkawa. Lu zawho di masırhonutho gıdmıştawtıfi a hadome di Sunados kulle u rişone ma citotho mşahılfe du camaydan cam mathlone ma tarte şultınwotho d’Boğdod udu qlimo d’Kurdistan.

Mor Awwa Ro’il dkıtyo ışme u cılmoyo David Royel, mawlid b’Şikago b’Amerika ban 1975, ma tre abohe Koriş u Florens Royel awkith u fatıryarxo hatho barmothoyo Amerikoyo Othuroyo mu generasyon qamoyo du camaydan d’Amerika’yo. Ubı cımro d’16 ışne mıştawtafwole la haye ruhonoye di cito d’Madınho d’Othuroye.

Ba 2008, David Royel masrahwo lu darğo d’efesqufo di marcitho d’Kalifornya d’Amerika bu syomido du mnohnafşo fatıryarxo Mor Dınxa 4’yo, u mnaqewole u ışmo d’Awwa dkıtyo u sukolayde Abo bu leczo Suryoyo Madınhoyo. Bi şato da 2015, Mor Awwa Ro’il mnaqewo notarrozo di Sunados di cito d’Madınho d’Othuroye. Bi şato dan 1999 qayıthwole sohdutho bu haqlo di theoloğiya mi bethsawbo d’Sant Mari Of the Lick. Ubıthır mathe qayıthwole u darğo di Doktora bu haqlo di theoloğiya mi bethsawbo madınhoyto du Vatikan dkıtyo b’Roma.