Mtayib sepmposium beyn da şutose da neşe bi Hasake

HASAKE, Suriya —Bu calway “camıhdode laşan du snodo da neşe d’Sweda bu nfoqo mqabıl du qtolcamo”, u platform da hfitwotho mşawtfe da zawce uda tukose da neşe du garbiyo udu madınho d’Suriya, mtayable adyawma semposyom du diyalog bi mditho di Hasake dmıştawtaflele zıd m’65 neşe dkımmathli gabe u tuksoe da neşe, baynothaye u Huyodo da Neşe Suryoye d’Suriya HNSS, u lumodo d’Star, i şabake da rişınwotho du şlomo, i mtaaksto d’Şawska, u mawtbo di athto d’MSD, i sdirutho di athto du garbiyo udu madınho d’Suriya, u kunoşo da neşe d’Zannubia, u mawtbo di athto di kinutho kenşoyto, u mawtbo da yaqrotho da sohde, u mawtbo di athto d’Suriya u neşe şarye. 

Bu semposyonano drişi tarte sebwotho: i sbutho qamoyto i aykanoyutho gawonoyto d’Suriya wa dyoşe dıkmisomi bhaq di athto Suriye yo. Bu tarano rizi a’şıklat mşahılfe du cnufyo uda dyoşe dıkmisomi gawonoyith cala neşe d’Suriya, u mahke calu dawro dıkmıştacyole i athto bu nfoqo mqabıl da casqıwothani. 

I sbutho trayonitho kalyo cala gunhe ucala dyoşe dıkmisomi bhaq da neşe di hiğmonutho d’Sweda bu taymno d’Suriya. Bu tarano mşalıt bahro cala casqıwotho da neşe uda nacime d’Sweda ucala gunhe dıkmisomi bhaq dıththe.  

U semposyonano hthim bı menyono d’fuqdone dkıtlın u nişo dsındi i athto d’Suriya, udımşalti bahro cala casqıwotho dıkcayşolın, udmıftıh cufqe rwihe laşan di awyutho udu fulhono mşawtfo bayn da neşe ba fenyotho mşahılfe d’Suriya.