MUB frısle buyono calu şnoyo d’Albert Hadodo

U mawtbo umthoyo d’Bethnahrin frısle egartho da buyoe bhaq du şunoyo du mothonoyo u sanodo du ağuno di hirutho Albert Sevinç  Hadodo.

MUB bi egartheyde dımşadrole li iqartho du mnoh nafşo komır, U Albert farsufo dıkmimıd xıd mathlo bi fetekariye rahomo du cameyde u sanodo da fulhone du ağuno di hirutho du acameydan.

İ egartho dMUB hawxa kımşaryo Myaqro Albert Sevinç Hadodo dkıtyo mothonoyo, u sanodo du ağunaydan u camoyo bu siqumo d’17-07-2020 nqil ma hayani azabnoye.

Myaqro Albert Hadodo bnetije dkewo yaquro mvayacle a hayayde, u haşo du tebano kfılğinale cami eqarthayde u cama ruhmayde. Albert Hadodo kibe dmimıd mathlo mi şaxsiyayde d’ba hayayde kulle dkıtwe tacobo, fedekar, rahomo di mcadronutho u humanist. Me Suriya hol Armenya, me Urifi holu Iraq mqadamle mcadronutho lğalabe şutose du camaydan uda came hrene, u mqadamle mcadronutho l’mınyono celoyo d’eqaryotho. Bi wasita du fond dımşatasle mınyono olsoyo ma mabucayde du momuno bşıkıl mtakso mahtile li teşmışto da bnaynoşo u hawi mcadrono leşan du şuşoto da şutose.

MUB dıgmahke calu snodo dsamwo u mnohnafşo la şutose du cameyde hawxa kımdawım bi egarthoda buyoe:  Myaqro Albert Hadodo dkıtwe ha ma mşatsone d’Suroyo TV, dilonoyo hule yasifutho la fulhone du Sayfo udu tboco froso u sındile. Hani ışne yarixe bhaymonutho qwitho hawi sanodo lu ağuno di hirutho umthoyto dımmaşyo bi rişonutho du Mawtbo Umthoyo d’Bethnahrin, u hawile sanodo maddi u macnawi.

U mawtbo umthoyo d’BEthnahrin bi egartho komır gıdmcişinale bu maktbzabno du ağuneydan kulnaqqa: Myaqro Albert Hadodo bi mothonoyutho dı bnele, bi mıthcadronutho dımşawşatle ubi mardutho du qyomo di umtho kul naqla gıdcoyış bu ağunaydan uba lebawotho du camaydan. Calathe olsoyoyo ğalabe dnıfqina moro bşıkıl dıkşowe lu hawraydan u myaqro, dmacışinale, dmawfıqina hırge mu pratikayde da haye u dmahkenale la jilat dothe.

Li yurtutho ula timoyotho dı xlıqle Myaqro Albert Hadodo  calu asas di  idactho di umtho, wi hubo dkıtwole la Suryoye, Armınoye ula came hrene. Xıd Mawtho Umthoyo d’Bethnahrin naqla hreto ktılbina rişo basimo li eqartho d’Albert Sevinç Hadodo u kfılğina u haşaththe.