Pompeo gzımle a marıhbone d’Hizballa u d’Alhaşd Alşacbi

Mbayın farsufo hreno dımşakıl i şultonutho du Iraq mdarbıd du mraşho Cadnan Alzufi dmıstacfele mi wolithayde.

Megabo hreno, u waziro di baroyutho d’Amerika mawdacle da grube mzayne d’Alhaşd Alşacbi grube marıhbonene, ulaybın dımbayni u rişwazire hatho du Iraq.

U rişqutno du Iraq Barham Salıh adyawma hule teklif lu rişono da istixbarat athronoye Mustafa Alkathimi dımşakıl huwe i şultonutho hathto du Iraq mdarbıd du mraşho Cadnan Akzurfi dmıstacfele mi wolithayde.

Lfuth u marsum qutnuthoyo dıfris adyawma, Alkathimi gdımbayın awazirayde u gdımqadım i şultonuthayde lu parlamento laşan dmaydo tuxlono tayid b’zabno d’30 yawme.

Alkathimi bi maqırhonutho dıfrısle bi dafayde du Twiter, hule şudoyo lu camo dgıdfolıh laşan dımşakıl şultonutho dıkmahto atalabe da Iraqoye bi qadmoyutho di tahraztayda, udıknıfqo moro li morutho du athro ulu momunayde. Alkathimi d’cımre 53 ışne, mıdle i wolitho d’rişono da istixbarat athronoye du Iraq i şato da 2016 bu zabno du rişwazire dmeqım Haydar Alcibadi.

Mu zabno dmıstacfewole Cadıl Cabdılmahdi mi rişwazirutho du Iraq, hathe da tloth naqlatyo dıkmibayın mraşho dımşakıl i şultonutho hathto bıthır mi isticfa dımqadmowole Muhammad Tawfiq Callawi u d’bıthır mene Cadnan Alzurfi.

Megabo hreno, u waziro di baroyutho d’Amerika Mayk Pompeo bi maqırhonutho dhule athmıl, mawdacle da grube mzayne du gabo d’Hizballa du Iraq awkith d’Alhaşd Alşacbi grube marıhbonene, wu camo Iraqoyo boruyoyo menaye. Pompeo mawdacleste da grube d’Alhaşd Alşacbi laybın fayış dımbayni u rişwazire hatho du Iraq, udmahti ido calu fusqono siyasi du athro. Be bzabno, Pompeo bi maqırhonuthayde mawdacle d’Amerika lgıdmaqimo atedbire momunoye mcalu İran ida dlımakle u snodayde li marıhbonutho, u mathkarleste du gabo d’Hizballa d’Lebnon lıfayışle u haylo dkıtwole meqım, cal dıqtici a mabuce du snodayde.