Qoyumo Steve Georganas mqadamle talab li şultonutho u lu parlamento d’Australia dmawdın bu Sayfo dsim calu camaydan

Kul dkothe kıqowe u gado, di şultonutho d’Australia dmawdıyo bu qtolğenso dsımwola i mamlaxtho da Cuthmanoye cala came Mşihoye ban 1915.

U qoyumo Yawonoyo-Australoyo du gabo Falohe Steve Georganas, mqadamle egartho d’talab li şultonutho ulu parlamento d’Australia, dmawdın bu Sayfo dsim calu camaydan, cala Pontusoye u Armınoye.

 İ sbutho du qtolğenso dsımwola i mamlaxtho da Cuthmanoye cala came Mşihoye ban 1915, mıdla naqla hreto duktho bu yawmoyo d’Australia-dilonoyith bıthır mıd u rişono d’Amerika Joe Biden mawdewole 24 bu yarho d’Nison bu qtolğenso dan Armınoye.

U qoyumo du gabo da Falohe d’Australia Steve Georganas dkıtyo mu şerşo mu Yawnan, mqadamle egartho dilonoyto leşan dmıdroşo bu parlamento du athro. Bi egarthathe’ste tlıble Georganas dmisım quwolo acla bnişo dmitıctarf bu qtolğenso dsımwo ban 1915 calu camo Pontusoye, Suryoyo Othuroyo u Armınoyo.

Bi egarthathe u qoyumo mırle; İ egarthathe dımqadmoli, latla şıkıl d’karakter leşan dmısnıd belhude ha camo. İ egarthathe kmısnodo me mınyono celoyo d’qoyume u ono kmıtyaqano dhawi şuhlofo bu renyo ubi hzayto-bıthır mıd u rişono d’Amerika mawdewole bu qtolğenso dan Armınoye. Kull naqla hawi keşlo ma şultonwotho uma gabe bi sbuthathe, elo ucdo kmıtyaqano dgımotina l’netiçe.

İ egarthathe du qoyumo Yawnoyo kmıntır dmıdroşo bu parlamento d’Australia ba kmo şabe dıbqamuthayna u en dothe dmitaqbılo, gıdhuwyo hatho i dawse qamayto u mbaynonitho leşan dmisım bıthır quwolo acla. Steve Geroganas mırle; Ahnaste klozım xıda athrawotho hrene, dmawdena bu qtolğensano cal dhawxa gunho lıkowe naqla hreto dmikarır. İnaqla d’ahna lo tolena i şrorutho, gıdmitakle bu dactith.