Qtil hol ocdo 240 folhe bu qlimo d’Qarabax

Zıd me 240 folhe qtili hul ucdo bu qlimo d’Qarabax bi netije du qrobo qaşyo dkımdawım bayn Armenya u Azerbaijan.

 Camgabıdathe, i şultonutho d’Armenya tlıbla fuşoqo me Amerika cali sbutho da tayısyotho folhoye d’F-16 dıkmıstacımlolın Turkiya bu hjomayda cala mdinoye d’Qarabax.

 İ wazirutho du sutoro d’Armenya mawdacla da taxtuşe b’qaşyutho adyawmaste mdawamlın ba gbine mşahılfe du qrobo bayn da haylawotho d’Armenya wu gayso d’Azerbaijan dıkmısnıd me Turkiya bu qlimo d’Qarabax dıktolıb i şaryuthayde.

Lfuth mşale Armınoye dkıtne bu qlimo d’Nagorno Qarabax, adyawma 21 folhe hrene qtili bu qrobo mqabıl d’Azerbejan, u bu şıklano u menyono da folhe dıqtili bu qlimo mu zabno dımşarewole u qrobo 27 bu yarho d’İlıl dşaficina uhul ucdo mati l’244 folhe Armınoye.

Camgabıdathe, u rişqutno d’Armenya Armen Sarkisyan bi maqırhonutho dhule athmıl lu froshezwo d’Sky News Alcarabiya, makadle di mudaxala folhoyto dı Turkiya maqşela u kriz zıd cam Azerbaijan, u thımle Turkiya dkımnasyo dsaymo qtolğenso hatho mqabıl da Armınoye b’Qarabax. Sarkisyan mırleste “u kriz lıgıdmışre bu darbo du haylo folhoyo. Turkiya mşadarla olufe d’jatawiye l’Azerbejan u hani kulle marıhbone tuxmonoyene. U medano lo balhude kmacjız anArmınoye, elo kmacjızıste ğalabe athrawotho qlimoye xıd Rusya wu kenşo emwothoyo. Lıkıbcina dmıxlıq Suriya hathto b’gawıd du qlimo Qarabax”.

Mxasra hreto, u rişwazire d’Armenya Nikol Paşinyan tlıble mi mdabronutho d’Amerika dobo fuşoqo cali sbutho da tayisyotho folhoye du qrobo d’F-16 dıkmıstacımlolın Turkiya bu hjomayda cala mdinoye u cala qıryawotho mşayne d’Qarabax.

Bebzabno, Paşinyan ba nesore dhawile athmıl bu talafon camu rişqutno d’Rusya Vilademir Putin, drışle aşuşote haroye du qrobo drawıh ğalabe b’Qarabax. Lfuth u buyono dıfrısle u Kremlın, Putin makadle l’Paşinyan dıklozım dmitaklın afulhone bceldboboye bu qlimo d’Nagorno Qarabax.