Rişwazire Nawaf Salam mawdacle dıkmıtlıb mu gayso d’Lebnon dmaslım tahrazto leşan u zatno di Hezbollah meqım mu siqumo d’31 d’Ob

BEYRUT — I şultonutho d’Lebnon mtayabla athmıl knuşyo bu qusro di rişonutho, laşan dmıdroşo i sbutho dmitasır u zayno balhude cami şultonutho, bu zabno dıksaymo Amerika hboso rabo laşan dmibayno tahrazto zabnoyto du groşo du zayno d’Hizballa. 

U mawtbo da wazire layım athmıl bi rişonutho du rişqutno d’Lebnon rabhaylawotho Josef Coun, ubi tahrazto da fulhonayde kıtwo sebwotho mşahılfe, bi qadmoyuthaththe dımdawım u droşo bi sbutho dmitafıt la haye u buyono da wazire dıktolıb dhowele Lebnon morutho cala n’arcothayde kulle bu haylayde u yothoyo. Udmıdroşi a’tedbire dilonoye dmidi bi sbutho di şalyuthzayno dmaklewola u qrobo bayn İsroyel u Hizballa bu siqumo d’27 bu yarho dı Tışrın u Haroyo dşaficina. 

U rişwazire d’Lebnon Nawwaf Salam bi maqırhonutho dhule bıthır mıdkamıl u knuşyo di şultonutho mırle “u buyono da wazire di şultonutho wu mamlo di yimoyo du rişqutno kım’akdi i wolitho dkıtla i şultotnutho dfoyış u zayno balhuda masro acma”. 

Salam mawdacle ste du mawtbo da wazire fsıqle dımdawım u droşo da talabe d’Amerika bıhdo ytawto dgıdmitaybo 7 bu yarhano d’Ob. U makadle ste di şultonutho hula teklif lu gayso dımbayın tahrazto huli harayto di şatathe laşan u zayno dfoyış balhude masro cami şultonutho, wi tahraztathe ste gıdmiqadmo lu mawtbo da wazire meqım mu siqumo d’31 bu yarhano. 

M’gabo hreno, u notarrozo gawonoyo d’Hizballa Nacim Qasem mawdacle du gabayde lıgıdmaqbıl kul şıkıl dı tahrazto zabnoyto laşan dmaslım u zaynayde bu zabno dkımdawmi a’hçome bceldboboye d’İsroyel cal Lebnon. Qasem sımle ste qroyto li şultonutho d’Lebnon dıdırşo stratiji di mşaynutho d’athro lo groşo du zayno, u mırle “ktılbina mi şultonutho dımbayno tahrazyotho laşan du nfoqo mqabıl du hboso uda tehdide udmi’amın u sutoro, ulo dmaşılho Hizballa a’mkonayde wu haylayde”.