Rusya thımla Turkiya dıkdeyşo uqyomo d’Sochi

A hayle Turkoye wa marhıbonathe b’Suriya, kımdawmi a hçomathe cal dukotho frişe du garbay macırbo di fnitho d’Cayn Cisa.

 Cala hçomani’ste Rusya mahwela hfuxyo u mawdacla, da cuqobani dıksaymo Turkiya cali fnitho, dyoşo du qyomo dımdewo beyn hıdode b’Sochi’yo.

A Haylawotho d’Suriya Demoqratoyto, hani zabno kobın funoyo la hçome dıksaymo Turkiya wa marhıbonayda d’Suriya cali fnitho d’Cayn Cisa u hedora-dilonoyith cal Mialağ ucal Saida dkıtne bu garbay macırbo di fnitho u qariwe lu darbo Emwothoyo d’M4. Cali sbutho da hçomani d’Turkiya uda marhıbonayda d’Suriya, krıhla Rusya a hçomani u mawdacla-dkıtne dyoşo du qyomo dımdewolın camhıdode ba droşe d’Sochi.

Bu mluwo da 10 du qyomano’ste, klozım a hayle d’QASAD dmıgroşiwo 30 kilometre ma thume d’Turkiya leşan dmitarkıw şalyuthzayno. Calu hfuxyano dmahwela Rusya’ste xliq otho d’şwolo-cala esore beyn da 2 athrawotho, cala mkone du şuhlofo du kyono da esorani dkito ucdo beyn Turkiya u Rusya calan arcotho d’Suriya.

Bebzabno, hathe inaqla qamaytoyo’ste d’Rusya bşıkıl ftiho kıtuhmo Turkiya bu dyoşo du qyomo d’Sochi-dımdewo bu yarho d’Teşrin u qamoyo da 2019. U mcadrono du rişono du Qentrun Rusoyo-rabhaylawotho Alexander Karpov mırle; Rusya ğalabe caçızto’yo calu zawcano da hayle Turkoye b’Cayn Cisa u b’Raqqa. A hçomani da Turkoye, dyoşo’yo calu ittifaq du fhomo dhawiwo beynothayna leşan dmışre u kriz d’Suriya.

Rusya u Turkiya’ste gıdsaymiwo cuqobe du duyoqo di mşaynutho 10 kilometre ban arcothani. Bu zabno du hfuxyano dmahwela Rusya l’Turkiya, konvoy hreno d’40 radoyotho u qamyune da hayle Amerikoye cabır athmıl li Hasake. Bu konvoyano dcabır mu Cıraq lıgawe d’Suriya kıtwo zayne, buğre uğer lojistik folhoyo dmawbıl li nuqaztathe b’Al Yarubiyah.