Trump hadiroyo l’ytawto cam Putin u Zelenskij

WASHINGTON/MOSKO — U rişqutno d’Ukraina Volodimer Zelenski sımle qroyto dmitayıb lqoyto bayne ubayn du rişqutno d’Rusya Valdimer Putin, bnişo dmitahıt huthomo lu qrobo admonoyo dkımdawım b’Ukraina. 

Zelenski bi maqırhonutho dıfrısle ba dafe kenşoye du nawlo mırle “ahna b’Ukraina ğalabe naqla mırlan u ğalabe naqlat mawdaclan da şroye şarire kibe dhowın m’athrone inaqla dıkmisomi ma rişone. Ulsoyoyo ğalabe dmibayın zabno mhadıdo lawxa knuşye udmibayni ste a’sebwotho dgıdmıdroşi ebe”. 

I qroytathe dsımle Zelenski athyo luhwoyo bu zabno dsim şudoco mi sictho da sebwotho baroye du parlamento d’Rusya dmawdacla da hıdriyat di lqoyto bayn d’Putin wu rişono d’Amerika Donald Trump mşarelın ucdo şariroyith. I sictho da sebwotho baroye grışla ste u zuhoro calu mathlono dilonoyo d’Amerika Stev Witkov dmahwele methfathonutho uklayotho dkibe dmıdroşi bi sbutho du tetimo du qrobo bayn d’Mosko u Kiyev. 

U mcadrono du rişqutno d’Rusya Yuri Oşakov mawdacle d’Mosko u Waşington matın l’awyutho dmitayıb lqoyto bayn da rişone da tre athrawotho ba yawme dıbqamuthayna, wa fulhone laşan di sbuthathe mşarelın ucdo. Oşakov mırle ste “lfuth u renyo dımqadım mi xasra d’Amerika, mte l’awyutho bu prensib dmitayıb lqoyto bayn d’Putin u Trump ba yawme dıbqamuthayna. Ubi methcadronutho da hawronaydan an’Amerikoye mşarelan ucdo dfılhina cal sebwotho mhadıde”. 

Athmıl ste Trump mawdacle dkito texmin rabo dımtayıb knuşyo cama tre baramnayde d’Rusya ud’Ukraina cal qariwo ğalabe. Elo Trump lımbayanle ema u ayko gıdhowe u knuşyano dkıtle u nişo dmakle u qrobo admonoyo bayn d’Mosko u Kiyev.