25/07/2021

Tukoso şaryo da zedqe noşoye du İran mawdacle ba tagliyotho dsim qtil 10 farsufe

Tukoso şaryo da zedqe noşoye du İran dıkmcaqıb i aykanoyutho du athro mawdacle, du mınyono da farsufe dqtili ba tagliyotho dıkmdawmi bu İran calu kriz da maye mati l’10 mtagliyone.

Bebzabno u İran, rfıdle i maqırhonutho dhuwola athmıl i rişonitho du Mawtbo da Zedqe Noşoye d’Emwotho Mhaydotho Michelle Bachelet.

Bu qlimo d’Xuzestan dkıtyo bu tayman macırbo du İran ubı hol 30 mdinotho hrene du athro, kımdawmi a tagliyotho du camo cali bsirutho da maye nadife du ştoyo. Elo bu zabno dıkmitahwe u şwolo da maye xıd celtho la tagliyothani, bıthre du qetrano kito i frişutho wu qedomo d’Tehran li qalılto da Caraboye dıkhoyın bu qlimano.

İ aykanoyuthathe i harayto du İran, kmicaqbo me qariwo lu Ajans da tebe da hfite da Zedqe Noşoye dkıtyo tukoso şaryo dıkmşaçıc u dıkolıb a zedqe da İranoye kulle.

Bi maqırhonutho dfrısle u tukosano athmıl maglele, du mınyono da qtiloye mu zabno dımşarelın a tagliyothani 15 bu yarhano, 10 farsufe’ne ulo xıd Tehran kımdacyo dkıtne 3.

U tukoso şaryo maglele’ste a eşmone da qtiloye kulle dkito beynothaye 2 farsufe laltah man 16 eşne uda hayle di mşaynutho msıklın holucdo 102 mtagliyone. Me gabo hreno, u İran mahwele hfuxyo calu mamlo dsımla athmıl i rişonitho du Mawtbo da Zedqe Noşoye d’Emwotho Mhaydotho Michelle Bachelet.

Bi maqırhonutho dhuwle u İran lu tbocofroso, rfıdle a thome d’Bachelet u mawdacle, d’polis u 2 mtagliyone qtili ba tagliyothani dıkmisomi me farsufe dıkxulqi b’idactho jğuşyo bu athro u dıkmohın zayno ba mtagliyone uba hayle di mşaynutho. Bachelet mırwola; U mhoyo wu msoko da mtagliyone, belhude zıttır gıdmaqşıyo i aykanoyutho du athro u kibe bu dumyano dhowe gunho bu İran.

Check Also

Bi tahrazto di orucutho dıfriso b’Suroyo tv drişo isbutho du sxoro du gabo demoqratoyo da came HDP

Bi tahrazto di orucutho dıfriso athmıl b’Suroyo tv drişo i aykanoyutho harayto d’Turkiya w…