Turkiya kımdawmo bu qşoco da dawme da cobe di hiğmonutho d’Nuhadra
İ wazirutho du Sutoro Athronoyo d’Turkiya mawdacla, bu zabno dıkmdawmi a cuqobayda calu gerilla di PKK bu garbyo du Iraq, qtil ha ma folhayda b’furqoco d’foquctho dmahto calu darbo.
Me gabo hreno kmitawdıc, da hayle kaboşe d’Turkiya kımdawmi bu qşoco da dawme da cobe di hiğmonutho d’Nuhadra.
Bu zabno da hayle kaboşe d’Turkiya kımdawmi a cuqobathe calu gerilla di PKK b’dukotho frişe du garbyo du Cıraq, dışle folho Turkoyo cal foquctho dmahto bi arco u baroyo qtil bi duktho. Bu furqocano’ste mawdıc dfolho hreno mçarıh yaquro U gayso kaboşo d’Turkiya dkıtyo bu garbyo du qlimo, camgabe dıkhoçım cala qıryawotho da comure d’Nuhadra, kıqoşıc’ste a cobe di fnitho.
Mawdıc dhani yarhe, a hayle Turkoye kıqutci a dawme wa comure da qıryawotho mahwelın u hfuxyathe u mzaharlın, dgısaymi protesto a nuqazyotho folhoye d’Turkiya dkıtne bu qlimo, en dothe dımdawım u qşocano da cobathe. Ba surotho dgrişi mi qritho d’Hirore, kımahwe u mınyono da dawme dqtıcla Turiya u mawdıc, dhano hawbo mqabıl du mahduro du qlimo d’Kurdistan’yo.
İ şultonutho d’Arbil mawdacla, dhawilın esore cam Turkiya bi sbuthathe, elo a fulhonani heş kımdawmi. A comure d’Nuhadra, bu yarho d’İyor’ste mahwewolın u hfuxyathe mqabıl du qtocano da qayse. A comure di qritho d’Hirore mawdaclın, dhuwlın aftho l’Turkiya hol yawme d’Hamşo, dmaklıyo u qtocano da dawme u en lo maklın a fulhonani, gıdmabdın tagliyotho mqabıl d’Ankara.
Mawdıc da qayse da dawmani’ste, kımzabnolın Turkiya bu pazar komo u ğer’ste kmitıstacmıli lu bnoyo da darbone uda nuqazyotho folhoye d’Turkiya bu qlimo d’Kurdistan. İ wazirutho du mahduro du qlimo mawdacwole bu yarho d’İyor, dhol 4 alfo dönumat d’arcotho qşici a dawmathe.