18/04/2022

U camaydan d’Turcabdin, di Daşto d’Ninwe u d’Caynkawa mcayadle u cedo da Oşacne

A’citotho di mditho d’Midyat uda qıryawotho Suryoye dı Turcabdin du tayman madınho dı Turkiya, dıqlın athmıl a’noquşaththe wa nacime dıtcınlın şemce bidothaye mzamarlın u mırlın: oşacno labre dı Dawid. Camgabıdathe dilonoyith bi daşto d’Ninwe ubu garbiyo du Ciraq, an’abne di cito Suryoyto Ortodoksoyto mhalaxlın b’zawhe da Oşacne u fsihi bu cboro d’Moran Yeşuc Mşiho meqım 2 alfo ışne li mditho d’Urışlem.

18/04/2022

Bı muzoğo malyo fsihutho u hulhole da neşe ub’mıştawtfonutho rabtho d’nacime, an’abne du camaydan u Suryoyo Ortodoksoyo dkıtyo masro camu surgodo Yolyani catiqo, mcaydale athmıl u tekso du cedo da Oşacne bi mditho d’Midyat uba qıryawotho Suryoye kulle dı Turcabdin bu tayman madınho dı Turkiya.

Bi mditho d’Midyat, athmıl u kohno di cito d’Mor Barsomo qaşişo İsahq Ergun mrayşanle i slutho du qurobo alohoyo da Oşacne, bi methcadronutho d’grub da şamoşe udi gudo du koral di cito. Lu zawhano da Oşacne, mıştawtafle ste kunoşo rabo dımhaymne, baynothaye menyono celoyo d’nacime dıtcınlın şemce u tarfe da zaytune bidothaye u mhalaxlın b’zuyoho hedor di cito d’Mor Barsomo.

Bi cohnutho du yawmano, qaşişo İshaq bu mamlo dsımle la mhaymne,  mhanele u camaydan kule di fnitho dı Turcabdin bu cedo mqadşo da Oşacne, u mşaçcile dfayşi thabute bu cafraththe, udnıfqi moro lu leşonaththe, li yortuthaththe uli haymonuthaththe i Mşihoyto. Bebzabno, qaşişo İshaq sımle qroyto la n’abne di marcithayde dmaydi Moran Yeşuc Mşiho xıd mathlo elaye bi şabthathe du haşo bnişo dmıfsohi acme feshutho şarirto bi zoxuthayde calu mawto.

Camgabıdathe ba citotho Suryoye dı Turcabdin, baynothaye i qritho d’Arkah, Midın ud’Boqisyone u ğer, a’n acime tcınlın şemce u tarfe da zaytune bidothaye, u mırlın ste qole citonoye ba hfitwotho dımtaybi athmıl bu cedo da Oşacne. A’nacime cama yaqrothaththe ste mhalaxlın b’zuyohe ruhonoye hedor da citotho u mazcaqlın u mırlın “oşacno labre dı Dawid, mbarxoyo d’athi bışmıd d’Aloho”.

Ubu garbiyo du Ciraq ste, u camaydan u Suryoyo Ortodoksoyo mcayadle u cedo da Oşacne bı mıştawtfonutho rabtho d’camo, kohne u rişone tawdithoye. Bi mditho d’Barıtle bi daşto d’Ninwe, ba mowat dımhaymne Suryoye dılwışlın lbuşe marduthoye, mtayablın halxo da Oşacne ba zabuqone di mditho, u tcınlın bidothaye şemce, lohiyotho u tarfe da zaytune. Bıthır mıdkamıl u halxo, a’mhaymne mıştawtaflın lu qurobo alohoyo dımtayıb bi cito d’Mort Şmuni bı Barıtle, bi rişonutho du hasyo Mor Temothawos Musa u Alşamni dkıtyo u rişdayro d’Mor Matta du turo dılfof.

Ubi qastra d’Caynkawa, u rişono di marcitho d’Arbil ud’hedora da Suryoye Ortodoksoye hasyo Mor Niqodimos Dawud Matti Şaraf, mrayşanle u qeowo alohoyo da Oşacne bi cito d’Yuldath Aloho d’Im Alnur, bi mıştawtfonutho d’kohne u şamoşe uba mowat dımhaymne, bi sagiyuthaththe nacime.