U koalisyon Emwothoyo u Qasad msıklın mşalo d’Daciş b’Raqqa

 RAQQA, Garbay Madinho d’Suriya – Lfuth u tebo di Mşatasto da zedqe noşoye d’Suriya dıkmtahqıbo u qrobo gawoyo du athro, 18 bu yarhano sımle u tukoso marhıbono d’Dacış hçomo cala Haylawotho d’Suriya Demoqratoyto bi mdito d’Muhamida bu macırbo d’Deyr Ezzor. Bu hçomano 2 marhıbone dkıtwın rawixe cal darıxto du motor mhelın bu zayno bı radoyto d’QASAD, uha ma Mharbonayde nafıl Sohdo.

Mu şuroyo di şatathe uholucdo, sımle Dacış 112 hçome u furqoce ba dukotho di Mdabronutho yothoyto. Cala hçomani da marhıbono d’zayidi ba zabne haroyani cali xalyutho dkito bu athro ubebzabno, d’Amerika grışla mınyono ma folhayda lğer qentrune bu Madınho Mescoyo mcal fothe du qrobo beyn İsroyel u İran, sim athmıl cuqobo dilonoyo b’Raqqa.

U koalisyon Emwothoyo dmanhatle folhe mi helikopterayde b’Al Karamah, sımle athmıl cuqobo mşawtıfo cama hayle d’QASAD. Bu cuqobano’ste QASAD wa hayle du koalisyon Emwothoyo msıklın marhıbono d’Dacış bıthır zabno d’tehqobo. U marhıbonano kıtwole i mşalutho du nqolo da zayne uda foqucotho la marhıbone leşan dsaymi a hçomathe. Ba kmo yawme haroyani, sim şişaltho d’cuqobe.

Bi qritho d’Mansurah bu macırbo d’Raqqa’ste sımle QASAD wu koalisyon Emwothoyo cuqobo u msıke 2 marhıbone ubı cuqobo hreno dsim b’Yarmouk, msik 4 hrene. Bıthır mu msokani’ste a hayle du koalisyon Emwothoyo u QASAD sımlın dawriyat b’dukotho frişe di hiğmonutho leşan u duyoqo di mşaynuthayda.