U malolo da QASAD Aram Hanna m’akadle, da hayle kaboşe d’Turkiya kımdawmi a hçomathe calu garbyo ucalu madınho d’Suriya

GOZARTO d’BETHNAHRIN, Suriya – Bu zabno da hayle kaboşe d’Turkiya uda marhıbone noqufathe kımdawmi a cuqobathe cal Tel Temır, Kobani  uğer dukotho frişe du garbyo udu madınho d’Suriya, u malolo da Haylawotho d’Suriya Demoqratoyto (QASAD) Aram Hanna sımle qroyto lu kenşo Emwothoyo dkıtyo hfito b’Suriya, dmıştace u dawrayde u dmakle a hçome dıksaymo Turkiya ubebzabno m’akadle d’QASAD hadiro’yo dobe funoyo la hçomani da hayle Turkoye.

Hanna mahkele lu ajans d’Hawar cala hayle Turkoye dmaqşewolın a hçomathe b’tayosyotho dlo pilote ubı zayne yaqure calu qlimo heş bu şuroyo du yarho d’Nison d’safıcina u mawdacle a ışmone da farsufe dnafili Sohde, a hawbe dsimi wu husrono dhiw b’Tel Temır u Zarkan, Cayn Cissa ucalu kanton d’al Şahba.

Hanna m’akadle d’Turkiya wa marhıbonayda, mhelın’ste ba qıryawotho du camaydan d’Tel Temır b’zayne yaqure bnişo dmaxlın a qıryawothani ma comurathe u maqşelın a cuqobe oyaroye leşan dmohın ba mşale da hayle d’QASAD, da Mharbone nuxroye uda mşale di Mdabronutho yothoyto. İ sagiyoyutho da cuqobani dıksaymo Turkiya’ste, cala dukotho da mdinoye’ne bnişo dobın husrono u dmazici a comure.

Bu tarano Hanna mawdacle d’Turkiya kmıstacmılo ucdo i fırsa du qrobo dmabdela Rusya b’Ukraina leşan dmazido u dmaqşıyo a hçomayda a oyaroye calu garbay madınho d’Suriya u dkıbşo dukotho hathe. Ubi sbuthathe Hanna kali calu zabno du rişono catiqo d’Amerika dmawdacwole, da thume oyaroye d’Suriya bi mşaluthathe’ne u calathe klozım Woşington dlobo aftho la hçomani da Turkoye udu kenşo Emwothoyo dhowe sanodo bu terkiwo di mşaynutho udu şlomo bu qlimo.

The Turkish military has launched another round of artillery strikes in Northeast Syria, targeting farm lands between the Assyrian towns of Tel Juma and Tel Tamer. pic.twitter.com/qI7O4pRggQ

— ܝܼܫܘܿܥ (@AssyrianSR) May 22, 2022