U riş izğado amerikoyo u mathlono dilonoyo di Amerika leşan Suriya, Thomas Barrack, maclele i otho amerikoyto bu futoho di qentronutho du riş izğado bi Darimsuq

DARIMSUQ – 23 bu yarhano, mbayanwo Thomas Barrack-dkıtyo mu camaydan u Marunoyo d’Lebnon, mathlono dilonoyo d’Amerika l’Turkiya u l’Suriya. Athmıl’ste sımle Barrack i socuruthayde i qamayto l’Suriya u camu waziro di baroyutho d’Ascad al Şibani, şafici li rişizgadutho Amerikoyto d’sxirowa şato bıthır mıd mşarewole u qrobo gawoyo d’Suriya meqım 14 eşne.

Bu dumyano athmıl, b’zawho ruşmoyo ftiho i rişizgadutho u maclıyo i otho d’Amerika-xıd remzo lu şuşoto da esore beyn Woşington udi şultonutho zabnoyto d’Suriya. Bu şuroyo du yarhano’ste laqiwo u rişono Amerikoyo u rişono zabnoyo Ahmed al Şarıc b’Riyad u bıthır’ste fsıqwola Woşington dmaqimo a tedbire dmahtiwola calu rejim catiqo d’al Asad. Bi socuruthathe’ste, laqi Barrack u rişono al Şarıc.

Bu mamlo dsımle b’Darımsuq Barrack mawdacle, dkıtle haymonutho dkibe dhowe şlomo beyn Suriya u İsroyel u mırle; U qetro beyn da 2 athrawotho şbobe kibe dmışre, u hano’ste bu darbo du dialog. U ono komarno kiban dımşarena b’qyomo mşayno-dorşina i sbutho da thume beyn Suriya u İsroyel.

Barrack mawdacle’ste d’Amerika fayış lıkhayro b’Suriya xıd athro dıksonıd i marhıbonutho-cal du şwolano şafıc camu rejim catiqo. Elo camathe’ste i kongre d’Amerika kıtla ucdo 6 yarhe bida, dmaydo fusqono haroyo bi sbuthathe. Klozım dmitahwe mkono li şultonutho hathto d’Darımsuq dsaymo i wolithayda dlo mudaxala u dlo tehito d’şartat u talabe.

Meqım mu mazlayde l’Suriya, Thomas Barrack laqiwo u waziro di baroyutho d’Yurdnon Ayman Safadi leşan dorşi a şuşote haroye d’Suriya wi methcadronutho dbeynothaye leşan u snodo du maşıqlo du hethotho d’Suriya, dmihayıd u dmiharır u athro mi marhıbonutho.