U Slibo Suryoyo mabdele kampanya di mcadronutho la dıbhe du furqoco marıhbono dsımwo cali cito d’Mor Elias da Rom

BRITHO – ‘A hçome dcala citotho ucalu camaydan, hçome baroye cali hiyoyuthaydan u aclayna’ne. U nişathe, dmisım qtolğenso hrene calu camaydan’ne u ahna, lıgfayşina şalye mqabıl da hçomani’. A melani da şutose u gabe folitiqoye, kenşoye u marduthoye frişe du camaydan’ne.

Ba hfuxye dmahwe’ste, krih bkull meltho qşitho u qtolcamo dsımwo yawme d’Huşabo dşafıcina 22 bu yarhano d’Hziron cali cito d’Mor Elias da Rom Malkoye Orthodoksoye dkıtyo bi şawtho di Dwelca b’Darımsuq d’Suriya.

Calu husrono nafşoyo rabo dtrele u furqoco qtolnafşoyo dsımwo dhuwle’ste husrono li cito, a şutose frişe du camaydan di mcadronutho mabdelın kampanya bnişo dmiqadım mcadronutho msarhabto la dıbhe ula sniqoye du hçomano kule.

Bu tarano u Slibo Suryoyo wu Şlomo ba ferce dkıtte b’athrawotho frişe d’Urifi, mtayablın kampanya du teltimo d’mcadronutho la Mşihoye di Dwelca. U yuqro di kampanyathe gıdmıfrış lu şedoro d’mcadronutho du hulmono, snodo la yaqrotho dnafilın Sohde, mcadronutho momunoyto u nafşoyto dcayişi trawma, u snodo lu bnoyo ulu hethotho, snodo kenşoyo.

A şutosani frıslın’ste a numarat da kontowiye dkıtte, leşan uha dobıc u dıkhoze dkıtle mşalutho d’sonıd an ahunone u ahwothayde a Mşihoye di Dwelca dkıtne sniqoye. A şutosani-u Slibo Suryoyo u Şlomo kımmi’ste; Toxu laymina u dmahwena u snodaydan leşan a haye, lu sabro uli awyutho.