Xuroyo Sımcan Maqsi Alyas nqil ma hayani b’cımro d’85 ışne

U kohno di cito d’Mor Şarbıl da Suryoye Ortodoksoye bu athro d’Holanda xuroyo Sımcan Maqsi alyas nqil ma hayani b’cımro d’85 ışne.

Xuroyo Sımcan dımşane mi celtho du kewo di sobutho, camgabıd di mşablonuthayde bu athro d’Holanda, mbayanwo kohno li mditho d’Qamışli b’Suriya, uli mditho d’Bayrut b’Lebnon.

Xuroyo Sımcan Maqsi Alyas dkıtwe meqım u kohno di marcitho d’Mor Şarbıl di cito Suryoyto Ortodoksoyto bi mditho d’Amestırdam b’Holanda, athmıl 17 bu yarho d’Ob mşane ma hayani mi celtho di saybutho b erişkoyto d’Amestırdam.

Mnohnafşo xuroyo Sımcan mawladwo bi mditho d’Midyat b’Turkiya bi şato da na’1936, umi nıcmuthayda camu w’abro du cammo dayroyo mnohnafşo Abrohom, maftewolın fothaye lafi dayro d’Kırkımo du Zacfaran, u tamo u xuroyo yalıfwo u leşono Suryoyo wa tekse citonoye bi mdabronutho du tlithoytube hasyo Mor Yuhanon Dawlabani.

Xuroyo Sımcan bıthır mdımzawağwole a’hayayde cami bartho di hılto Nazira Şahin bi şato da na’1959, masrahwo kohno bu syomido du hasyo Mor Yuhanon Dawlabani bi şato da na’1960. Xuroyo Sımcan dsımwole i kohnutho l’zabno dıkmo ışne bi cito d’Adiyaman b’Turkiya, sımwole ste i mşablonutho di marcitho Suryoyto bi mditho d’Rişcayno b’Suriya.

Bi şato da na’1965 bıthır mıdkamılwo u bnoyo di cito d’Mor Afrem Suryoyo bi mditho d’Qamışli b’Suriya, mbayanwo xuroyo Sımcan u kohno qamoyo di marcithathe, ubu zabnawo mşataswole i gudo du koral di cito, u mawlafwole a’nacime wa şamoşe a’tekse di cito Suryoyto, ukaliwo calu tewlifo du leşono Suryoyo emhoyo.

Bi şato da na’1972 xuroyo Sımcan nqılwo li mditho d’Bayrut l’Lebnon, u tamo sımle i mşablonutho di marcitho di Msaytbe meqım mıdocır naqla hreto l’Suriya bi şato da na’1974, udhowe u kohno di cito d’Mor Yacqub bi mditho d’Qamışli. Ubi şato da na’1982 u mnohnafşo mgalwewole lu athro d’Holanda, u mşataswole i cito d’Mor Şarbıl b mditho d’Amestırdam, u sımwole i mşablonutho di marcithathe hula yawme haroye di mşawtbuthayde.

Ahna ste bışmıd di mdabronutho d’Suroyo TV, kımqadmina a’buyoyaydan a’lebonoye li iqartho du mnohnafşo xuroyo Sımcan Maqsi Alyas, ktılbina menaye basimutho d’rişo, ukımmina “Aloho dmaşwele li malkuthayde”.