17 ALFO athare gniwe dkıtwın b’Amerika matın lu Iraq

U Iraq mawdacle, d’matile zıttır me 17 alfo athare makthabzabnoye d’gniwiwo mu athro u dmacbıriwo lo qonunoyith heş ma 2003 l’Amerika.

Hın man atharani dmadcıri, kıducri l’meqın 4.500 eşne. İ mawdconuthatheste hiwo bu knuşyo dsim lu tbocofroso, mu waziro di baroyutho umu waziro di mardutho, du turizm udan athare du Iraq.

Bu knuşyo dımtayıb mşawtıfo lu tbocofroso mu waziro di baroyutho umu waziro di mardutho, du turizm udan athare du Iraq, m’akıd dmatilın zıttır me 17 alfo athare catiqe dkıtwın holucdo b’Amerika. An atharani, maslımi li rişizgadutho du Iraq b’Woşington u me tamo li arişkoyto Boğdod.

Woşington’ste meqım şabtho mawdacwola, dmabdela a fulhone du tedciro dan atharani lu Cıraq, dkıtwo 17. 321 menaye b’Amerika, 9 mu Yaban, 7 me Hollanda uha me İtalya. An atharani’ste dmadcıri b’3 maşıqle frişe, gniwiwo bu zabno du qrobo da 2003 u hın menaye’ste mahtiwo lu zebono ba dukane di şırke d’Hobby Lobby.

Hın ma falqe dmahtiwo lu zebono d’1.6 milyone dolare, zwiniwo me farsufe ma İmarat Caraboye ume İsarloye. An atharani’ste gniwiwo ma marhıbone d’Dacış ba 2014. Hol 15 alfo athare gniwiwo belhude mi bethcatiqotho Athronoyto d’Boğdod u mani madcır holucdo 7 alfo.

Wu heş kito athare catiqe di yortutho makthabzabnoyto du camaydan d’Bethnahrin dkıtne mvayce. Kito beyn da atharani dmadcıri me Amerika’ste kito falqe dkıtne 3.700 eşne u hrene’ste dkıtne 4.500 eşne u kıducri lu zabno dan abohothaydan; beynothaye i luho du humoso d’Gilgameş.